സിബിഎസ്‌ഇ 12-ാം ക്ലാസ് പരീക്ഷകള്‍ റദ്ദാക്കിയേക്കും, മൂല്യനിര്‍ണയത്തില്‍ മാറ്റം

Ajith.A

21 June 2020 10:29 AM

ന്യൂഡല്‍ഹി: സിബിഎസ്‌ഇ പന്ത്രണ്ടാം ക്ലാസ് വിദ്യാര്‍ത്ഥികളുടെ ബാക്കി പരീക്ഷകള്‍ നടത്താതെ ഫലം പ്രഖ്യാപിച്ചേക്കും. കോവിഡ് പ്രതിസന്ധി രൂക്ഷമായി തുടരുന്നതിനാല്‍ ബാക്കി പരീക്ഷകള്‍ മുഴുവനായും ഉപേക്ഷിക്കും. മൂല്യനിര്‍ണയ രീതിയില്‍ മാറ്റം വരുത്തിയാകും ഫലപ്രഖ്യാപനം.

ഒരു പ്രത്യേക മാര്‍ക്കിംഗ് സ്കീമിന് കീഴില്‍ പന്ത്രണ്ടാം ക്ലാസ് വിദ്യാര്‍ഥികള്‍ക്ക് നേരത്തെ ബിരുദം നേടാനുള്ള സാധ്യതയാണ് പരി​ഗണനയിലുള്ളത്. ഫലങ്ങളില്‍ അസംതൃപ്തിയുണ്ടെങ്കില്‍ വര്‍ഷാവസാനം ബോര്‍ഡ് നടത്തുന്ന പരീക്ഷയെഴുതാന്‍ വിദ്യാര്‍ഥികള്‍ക്ക് അവസരമൊരുക്കും.

കേരളമടക്കമുള്ള സംസ്ഥാനങ്ങളില്‍ നിലവില്‍ പന്ത്രണ്ടാം ക്ലാസ് വിദ്യാര്‍ഥികള്‍ക്കായുള്ള ബോര്‍ഡ് പരീക്ഷകള്‍ പൂര്‍ത്തിയാക്കിയിട്ടുണ്ട്. ഇവിടങ്ങളില്‍ കോളജ്-സര്‍വകലാശാല പ്രവേശന പ്രക്രിയ ഉടന്‍ ആരംഭിക്കും. രാജ്യത്ത് നിലവിലുള്ള സ്ഥിതിഗതികള്‍ കണക്കിലെടുക്കുമ്ബോള്‍ ജൂലൈ 1 മുതല്‍ ജൂലൈ 15 വരെ സിബിഎസ്‌ഇ പരീക്ഷകള്‍ നടത്തുന്നത് പ്രായോഗികമല്ല. ഉന്നത വിദ്യാഭ്യാസ സ്ഥാപനങ്ങളിലേക്കുള്ള പ്രവേശനം സംബന്ധിച്ച്‌ ആശങ്ക നിലനില്‍ക്കുന്നതിനാലാണ് ഫലപ്രഖ്യാപനത്തിന് മറ്റ് മാര്‍​ഗ്​ഗങ്ങള്‍ സ്വീകരിക്കാന്‍ തീരുമാനിച്ചിരിക്കുന്നത്. ഇതുസംബന്ധിച്ച്‌ ഔദ്യോഗിക അറിയിപ്പ് അടുത്തയാഴ്ച ഉണ്ടാകുമെന്നാണ് ദേശീയ മാധ്യമങ്ങളിലെ റിപ്പോര്‍ട്ട്.

ബിസിനസ് സ്റ്റഡീസ്, ജിയോഗ്രഫി, ഹിന്ദി (കോര്‍), ഹിന്ദി (എലക്ടീവ്), ഹോം സയന്‍സ്, സോഷ്യോളജി, കമ്ബ്യൂട്ടര്‍ സയന്‍സ് , ഇന്‍ഫൊര്‍മേഷന്‍ പ്രാക്ടീസ് , ഇന്‍ഫര്‍മേഷന്‍ ടെക്നോളജി, ബയോ ടെക്നോളജി എന്നീ പരീക്ഷകളാണ് ഇനി നടക്കാനുള്ളത്.