കാര്‍ഷിക കടാശ്വാസത്തിന്റെ പരിധി ഉയര്‍ത്താന്‍ മന്ത്രിസഭാ തീരുമാനം; 2 ലക്ഷം രൂപവരെയുള്ള കാര്‍ഷിക കടങ്ങള്‍ എഴുതി തള്ളും

News Desk

03 July 2019 05:08 PM

തിരുവനന്തപുരം: കാര്‍ഷിക കടാശ്വാസത്തിന്റെ പരിധി ഉയര്‍ത്താന്‍ മന്ത്രിസഭാ യോഗത്തില്‍ തീരുമാനമായി. രണ്ട് ലക്ഷം രൂപ വരെയുള്ള കാര്‍ഷിക കടങ്ങള്‍ എഴുതിത്തള്ളുമെന്ന് കൃഷി വകുപ്പ് മന്ത്രി വി.എസ് സുനില്‍ കുമാര്‍ അറിയിച്ചു.

ഇന്ന് ചേര്‍ന്ന മന്ത്രി സഭായോഗത്തിലാണ് കാര്‍ഷിക കടാശ്വാസത്തിന്റെ പരിധി ഉയര്‍ത്താന്‍ തീരുമാനിച്ചത്. നേരത്തെ ഒരു ലക്ഷമായിരുന്ന പരിധിയാണ് രണ്ട് ലക്ഷമായി ഉയര്‍ത്തിയത്. സഹകരണ ബാങ്കുകളില്‍ നിന്നെടുത്ത വായ്പകള്‍ക്കാണ് ഇത് ബാധകമാവുകയെന്ന് കൃഷി മന്ത്രി വി.എസ് സുനില്‍കുമാര്‍ പറഞ്ഞു.

പ്രളയം ഏറെ നാശം വിതച്ച ഇടുക്കി,വയനാട് ജില്ലകളിലെ കര്‍ഷകര്‍ക്കായിരിക്കും സംസ്ഥാന സര്‍ക്കാര്‍ തീരുമാനത്തിന്റെ ഗുണം കൂടുതല്‍ ലഭിക്കുക. ഇടുക്കി,വയനാട് ജില്ലകളില്‍ 2018 ഓഗസ്റ്റ് 31 വരെയും മറ്റ് ജില്ലകളില്‍2014 ഡിസംബര്‍ 31 വരെയും എടുത്ത കാര്‍ഷിക വായ്പകളാണ് പരിധിയില്‍ കൊണ്ടുവന്നത്.