കോവിഡ് 19; കൊച്ചി മെട്രോ മാര്ച്ച് 31 വരെ സര്വീസ് നിര്ത്തി
കൊച്ചി : കോവിഡ് 19 രോഗവ്യാപനം തടയുന്നതിന്റെ ഭാഗമായി കൊച്ചി മെട്രോ സര്വീസ് നിര്ത്തിവെച്ചു. ഈ മാസം 31 വരെ സര്വീസ് നിര്ത്തിവെയ്ക്കാനാണ് കൊച്ചി മെട്രോ തീരുമാനിച്ചത്. പ്രതിരോധ പ്രവര്ത്തനങ്ങളുടെ ഭാഗമായി 28 വരെ സര്വീസുകളുടെ എണ്ണം കുറച്ച് നിയന്ത്രണം ഏര്പ്പെടുത്താന് തീരുമാനിച്ചിരുന്നു. എന്നാല് കേന്ദ്രസര്ക്കാരിന്റെ പുതിയ നിര്ദേശം കണക്കിലെടുത്ത് മുഴുവന് സര്വീസുകളും നിര്ത്തിവെയ്ക്കാന് തീരുമാനിക്കുകയായിരുന്നു.
രോഗവ്യാപനം തടയുന്നതിന്റെ ഭാഗമായി രാജ്യത്തെ എല്ലാ ട്രെയിന് സര്വീസുകളും നിര്ത്തിവെയ്ക്കാന് തീരുമാനിച്ചിട്ടുണ്ട്. അന്തര് സംസ്ഥാന സര്വീസുകള് നിര്ത്താനും കേന്ദ്രസര്ക്കാര് നിര്ദേശിച്ചു. ഇക്കാര്യത്തില് ഉചിതമായ തീരുമാനം എടുക്കാന് സംസ്ഥാന സര്ക്കാരുകള്ക്ക് കേന്ദ്രം നിര്ദേശം നല്കിയിട്ടുണ്ട്.