കൊവിഡ് വാക്‌സിന്‍ സൗജന്യമായി നല്‍കുമെന്ന മുഖ്യമന്ത്രിയുടെ പ്രഖ്യാപനം പെരുമാറ്റച്ചട്ട ലംഘനം; പരാതി നല്‍കി യു ഡി എഫ്

Ajith.A

13 December 2020 11:09 AM

തിരുവനന്തപുരം | സംസ്ഥാനത്ത് കൊവിഡ് വാക്‌സിന്‍ സൗജന്യമായി നല്‍കുമെന്ന മുഖ്യമന്ത്രി പിണറായി വിജയന്റെ പ്രഖ്യാപനത്തിനെതിരെ പ്രതിപക്ഷം. മുഖ്യമന്ത്രിയുടെ പ്രഖ്യാപനം തിരഞ്ഞെടുപ്പ് പെരുമാറ്റച്ചട്ട ലംഘനമാണെന്ന് ആരോപിച്ച്‌ യു ഡി എഫ് തിരഞ്ഞെടുപ്പ് കമ്മീഷനെ സമീപിച്ചു. ഇന്നലെ നടത്തിയ വാര്‍ത്താ സമ്മേളനത്തിലുയര്‍ന്ന ഒരു ചോദ്യത്തിന് മറുപടിയായാണ് വാക്‌സിന്‍ ലഭിച്ചാല്‍ സൗജന്യമായി നല്‍കുമെന്ന് മുഖ്യമന്ത്രി പറഞ്ഞത്.

തിരഞ്ഞെടുച്ച്‌ ചട്ടങ്ങള്‍ ലംഘിക്കുന്ന രൂപത്തില്‍ മുഖ്യമന്ത്രി നടത്തിയ വാഗ്ദാനങ്ങള്‍ പരിശോധിച്ച്‌ നടപടി സ്വീകരിക്കണമെന്ന് ആവശ്യപ്പെട്ട് കെ സി ജോസഫ് എം എല്‍ എയാണ് സംസ്ഥാന തിരഞ്ഞെടുപ്പ് കമ്മീഷനെ സമീപിച്ചത്. മുഖ്യമന്ത്രിയുടെ പ്രഖ്യാപനത്തിനെതിരെ ബി ജെ പിയും രംഗത്തെത്തിയിട്ടുണ്ട്.