അധ്യാപകര്ക്കെതിരെ ഉയര്ന്നത് സ്വഭാവിക വിമർശനം; മുഖ്യമന്ത്രി
തിരുവനന്തപുരം: ശമ്പത്തില്നിന്ന് പണം പിടിക്കുമെന്ന സര്ക്കാര് ഉത്തരവ് കത്തിച്ച അധ്യാപകര്ക്കെതിരെ ഉയര്ന്നത് സ്വഭാവിക വിമര്ശമെന്ന് മുഖ്യമന്ത്രി പിണറായി വിജയന്. ഇത്തരത്തില് വിമര്ശം ഉയര്ന്നുവന്നില്ലെങ്കിലേ സമൂഹം മോശമായി എന്ന നിലയിലേക്ക് എത്തുക എന്നും അദ്ദേഹം പറഞ്ഞു. മന്ത്രിമാര് അടക്കം അധ്യാപകരെ വിമർശിക്കുന്ന പ്രസ്താവന നടത്തിയതായി മാധ്യമപ്രവര്ത്തകര് ശ്രദ്ധയില്പ്പെടുത്തിയപ്പോഴായിരുന്നു മുഖ്യന്ത്രിയുടെ മറുപടി. അധ്യാപകര് നാടിന്റെ ഗുരുനാഥന്മാര് ആണ്. അവരെ ബഹുമാനിക്കുന്ന രീതിയാണ് നാടിനുള്ളത്. ആ സ്വഭാവത്തിന് ചേരാത്ത ചിലര് ചില കാര്യങ്ങള് ചെയ്യുമ്പോള് അതേപ്പറ്റി വിമര്ശനം ഉണ്ടാകും.
അതല്ലേ കത്തിക്കരുതെന്ന് പറയുന്നത്. കത്തിക്കാന്പോയത് മാതൃകാപരമായ നപടിയാണോ? യോഗ്യമായ നടപടിയാണോ? ഗുരുനാഥന് ചെയ്യേണ്ടുന്ന കാര്യം തന്നെയാണ് ഇതെന്നാണോ പൊതുസമൂഹം പറയേണ്ടത്. സ്വാഭാവികമായി അതിനെ വിമര്ശിച്ചു എന്നുവരും. ആ വിമര്ശനത്തിന് എന്താണ് തെറ്റെന്നും പിണറായി ചോദിച്ചു.