ഇ.ഡി കസ്റ്റഡിയില് ബിനീഷ് കോടിയേരിക്ക് മര്ദ്ദനമേറ്റോ? ആശുപത്രിക്ക് മുന്നില് ബിനോയിയെയും അഭിഭാഷകരെയും തടഞ്ഞു
ബെംഗളൂരു: എന്ഫോഴ്സ്മെന്റ് കസ്റ്റഡിയില് ബിനീഷ് കോടിയേരിക്ക് മര്ദ്ദനമേറ്റോ? ഇന്ന് ആശുപത്രിയിലേക്ക് ഉദ്യോഗസ്ഥര് ബിനീഷിനെ എത്തിച്ചതിന് ശേഷം ബിനീഷിന്റെ അഭിഭാഷകന് ആരോപിച്ചത് ഇക്കാര്യമായിരുന്നു. ഇഡി ചോദ്യം ചെയ്യുന്നതിനിടെ ദേഹാസ്വാസ്ഥ്യം അനുഭവപ്പെട്ടതിനെ തുടര്ന്നാണ് ബിനീഷിനെ ആശുപത്രിയില് എത്തിച്ചത്. അത്യാഹിത വിഭാഗത്തില് രണ്ടര മണിക്കൂര് നിരീക്ഷണത്തിന് ശേഷം ബിനീഷിനെ ഇഡി ഓഫീസിലേക്ക് തിരികെ കൊണ്ടുപോകുകയും ചെയ്തു. ബീനീഷിന് ദീര്ഘനേരം ഇരുന്നതിനാലുള്ള നടുവേദന മാത്രമേ ഉള്ളൂവെന്നാണ് ഡോക്ടര്മാര് പറഞ്ഞത്.
നാല് മണിയോടെയാണ് ചോദ്യം ചെയ്യലിനിടയില് ബിനീഷിന് ദേഹാസ്വാസ്ഥ്യം അനുഭവപ്പെടുന്നത്. തുടര്ന്ന് ഇഡി ഉദ്യോഗസ്ഥര് തന്നെയാണ് അദ്ദേഹത്തെ ആശുപത്രിയിലെത്തിച്ചത്. ഇത് മൂന്നാം ദിവസമാണ് ഇഡി ഉദ്യോഗസ്ഥര് ബിനീഷിനെ ചോദ്യം ചെയ്യുന്നത്. ഇന്നത്തെ ചോദ്യം ചെയ്യല് അവസാനിപ്പിച്ച് സ്റ്റേറ്റ്മെന്റുകളില് ബിനീഷ് ഒപ്പുവെക്കേണ്ടതുണ്ട്. കസ്റ്റഡി കാലാവധി അവസാനിക്കുന്ന നാളെയും ചോദ്യംചെയ്യല് തുടരും. ഉച്ചയോടെ ചോദ്യംചെയ്യല് അവസാനിപ്പിച്ച് കോടതിയിലേക്ക് കൊണ്ടുപോകാനാണ് ഇഡി തീരുമാനിച്ചിരിക്കുന്നത്. ഇനി വീണ്ടും കസ്റ്റഡിയില് ആവശ്യപ്പെടാന് സാധ്യതയില്ല.
അതിനിടെ ബിനീഷിന്റെ മയക്കുമരുന്നു ബന്ധത്തിന്റെ ചുവടു പിടിച്ചുള്ള അന്വേഷണം മലയാള സിനിമയിലേക്കും അന്വേഷണം നീളുകയാണ്. കേരളത്തില് നടന്ന പൗരത്വ രജിസ്റ്റര് പ്രക്ഷോഭത്തില് പങ്കെടുത്ത ചലച്ചിത്രതാരങ്ങള് അടക്കമുള്ള ചിലര് ബിനീഷുമായി അടുപ്പം പുലര്ത്തുന്നവരാണ്. ഇവരില് ചിലര്ക്ക് ലഹരിക്കടത്ത് കേസില് അറസ്റ്റിലായ അനൂപ് മുഹമ്മദും നിയാസുമായും ബന്ധമുണ്ട്. ബെംഗളൂരുവില് നടന്ന നിശാ പാര്ട്ടികളില് ഇവര് പങ്കെടുത്തിട്ടുണ്ട്. ഇവരേയും കേന്ദ്ര ഏജന്സികള് നിരീക്ഷിക്കും.
ഇതു സംബന്ധിച്ചുള്ള വിവരങ്ങള് ആഭ്യന്തര സുരക്ഷാ വിഭാഗം ശേഖരിച്ചതായാണ് വിവരം. ബിനീഷിനെ കസ്റ്റഡിയില് വാങ്ങി ചോദ്യം ചെയ്യുമെന്ന സൂചനയാണ് ആഭ്യന്തര സുരക്ഷാ വിഭാഗം ഉദ്യോഗസ്ഥരും നല്കുന്നത്.
ആശുപത്രിയില് പ്രവേശിപ്പിച്ച ബിനീഷ് കോടിയേരിയെ കാണാനെത്തിയ സഹോദരന് ബിനോയിയെയും അഭിഭാഷകരെയും ആശുപത്രിയ്ക്ക് മുന്പില് സുരക്ഷാ ജീവനക്കാര് തടഞ്ഞു. അതോടെ ഇവരും സുരക്ഷാ ഉദ്യോഗസ്ഥരും തമ്മില് തര്ക്കമുണ്ടായി.
ബിനോയിയെയും അഭിഭാഷകരെയും ഉള്ളിലേക്ക് പ്രവേശിപ്പിക്കരുതെന്ന് ഇ.ഡി ഉദ്യോഗസ്ഥര് സുരക്ഷാ ജീവനക്കാര്ക്ക് നിര്ദ്ദേശം നല്കിയിരുന്നു. ബംഗളൂരുവിലെ വിക്ടോറിയ ആശുപത്രിക്ക് മുന്പിലാണ് നാടകീയ രംഗങ്ങള് അരങ്ങേറിയത്.