ബി.ആര് ഷെട്ടിക്കെതിരെ നിയമനടപടിക്കൊരുങ്ങി യു.എ.ഇ
ദുബായ് : പ്രമുഖ പ്രവാസി വ്യവസായിയും എന്എംസി ഹെല്ത്ത് കെയര് ഗ്രൂപ്പ്, യുഎഇ എക്സ്ചേഞ്ച് സ്ഥാപകനുമായ ബി.ആര് ഷെട്ടിക്കെതിരെ നിയമനടപടിക്കൊരുങ്ങി യു.എ.ഇ. രാജ്യത്തെ വിവിധ ബാങ്കുകള്ക്ക് അമ്പതിനായിരം കോടി രൂപയുടെ ബാധ്യത വരുത്തി വെച്ച സാഹചര്യത്തില് ഷെട്ടിയുടെ മുഴുവന് സ്വത്തുവകകളും കണ്ടെത്താന് സെന്ട്രല് ബാങ്ക് ഉത്തരവിട്ടു. ഷെട്ടിയുമായി ബന്ധപ്പെട്ട നിരവധി കമ്പനികളെയും കരിമ്പട്ടികയില് പെടുത്തി. ബാങ്കുകള് ഉള്പ്പെടെ എണ്ണമറ്റ ധനകാര്യ സ്ഥാപനങ്ങളില് നിന്ന് വന്തുകയുടെ വായ്പയെടുത്ത് മുങ്ങിയെന്നാണ് ബി.ആര് ഷെട്ടിക്കെതിരെയുള്ള പരാതി.
ഷെട്ടിയുടെ അക്കൗണ്ടും കുടുംബാംഗങ്ങളുടെ അക്കൗണ്ടും അദ്ദേഹത്തിന്റെ ഉടമസ്ഥതയിലുള്ള കമ്പനികളുടെ അക്കൗണ്ടും മരവിപ്പിക്കാനാണു മറ്റു ബാങ്കുകള്ക്കു സെന്ട്രല് ബാങ്ക് നിര്ദേശം നല്കിയിരിക്കുന്നത്. ഷെട്ടിയുടെ കമ്പനിയിലെ മുതിര്ന്ന ഉദ്യോഗസ്ഥരുടെയും മാനേജര്മാരുടെയും അക്കൗണ്ടുകളും മരവിപ്പിക്കും. ഈ അക്കൗണ്ടുകളില്നിന്നുള്ള ട്രാന്സ്ഫര് ഉള്പ്പെടെ നിര്ത്തിവയ്ക്കാന് ആവശ്യപ്പെട്ടു.
എന്എംസി 6.6 ബില്യണ് ഡോളറിന്റെ കടബാധ്യത അടുത്തിടെ വെളിപ്പെടുത്തിയിരുന്നു. വിവിധ ബാങ്കുകളിലായി കോടിക്കണക്കിനു രൂപയുടെ കടബാധ്യതയാണു കമ്പനിക്കുള്ളത്. ബ്രിട്ടനില് ഗുരുതരമായ സാമ്പത്തിക ക്രമക്കേടില് ഷെട്ടി ഉള്പ്പെട്ടതായി റിപ്പോര്ട്ടുണ്ടായിരുന്നു. ഷെട്ടിയുമായി ബന്ധപ്പെട്ട നിരവധി കമ്പനികളാണ് സെന്ട്രല് ബാങ്ക് കരിമ്പട്ടികയില് പെടുത്തിയിരിക്കുന്നത്. കര്ണാടകയിലെ ഉഡുപ്പി സ്വദേശിയാണ് ഷെട്ടി.