ഓണത്തിനും ക്രിസ്മസിനും പരീക്ഷകള് ഉണ്ടാകില്ല
തിരുവനന്തപുരം : സംസ്ഥാനത്ത് കോവിഡ് വ്യാപനം രൂക്ഷമായതോടെ സ്കൂളുകളില് ഓണത്തിനും ക്രിസ്മസിനും പരീക്ഷകള് ഉണ്ടാവില്ല. സ്കൂളുകള് ഉടനെ തുറക്കാനുള്ള സാഹചര്യം ഇല്ലാത്തതിനാല് വാര്ഷിക പരീക്ഷ മെയില് നടത്താനുള്ള ആലോചനയിലാണ് പൊതുവിദ്യാഭ്യാസ വകുപ്പ്. അതേസമയം സ്കൂള് തുറന്നാലുടന് പരീക്ഷ നടത്തണമെന്നാണ് കേന്ദ്ര നിര്ദേശം.
സംസ്ഥാനത്ത് അക്കാദമിക കലണ്ടര് പുനഃക്രമീകരിക്കാനാണ് പൊതു വിദ്യാഭ്യാസ വകുപ്പിന്റെ തീരുമാനം. ഇതിനുള്ള ശുപാര്ശ നല്കാന് എസ്.സി.ഇ.ആര്.ടി. ഡയറക്ടറെ ചുമതലപ്പെടുത്തിയതായി പൊതുവിദ്യാഭ്യാസ സെക്രട്ടറി എ. ഷാജഹാന് പറഞ്ഞു. രണ്ടാഴ്ചയ്ക്കകം റിപ്പോര്ട്ട് നല്കണം. കഴിഞ്ഞദിവസം കൂടിയ ക്യൂ.ഐ.പി യോഗത്തില് സിലബസ് വെട്ടി ചുരുക്കേണ്ടെന്ന് തീരുമാനിച്ചിരുന്നു. ഇപ്പോഴത്തെ സാഹചര്യത്തില് മാര്ച്ചില് അക്കാദമികവര്ഷം അവസാനിപ്പിക്കുന്നതിനു പകരം ഏപ്രില്, മെയ് മാസങ്ങളിലേക്കുകൂടി ദീര്ഘിപ്പിക്കാന് സാധ്യതയുണ്ട്.
നിലവില് നടന്നുവരുന്ന ഓണ്ലൈന് പഠനം കരിക്കുലം കമ്മിറ്റി യോഗം വിലയിരുത്തി. മുതിര്ന്ന ക്ലാസുകളില് മാത്രമാണ് ദിവസേന രണ്ടു മണിക്കൂര് ക്ലാസ് നടക്കുന്നത്. താഴ്ന്ന ക്ലാസുകളില് അരമണിക്കൂറേ അദ്ധ്യാപനമുള്ളൂ. 20 ശതമാനം പാഠഭാഗമാണ് നിലവില് പഠിപ്പിച്ചിരിക്കുന്നത്. ഇപ്പോഴും ഓണ്ലൈന് ക്ലാസുകളില് പ്രവേശിക്കാനാകാത്ത വിദ്യാര്ത്ഥികളുണ്ട്. കോവിഡ് ഡ്യൂട്ടിക്ക് അധ്യാപകര് പോയതോടെ പലയിടങ്ങളിലും ക്ലാസുകളും മുടങ്ങി. ഓണ്ലൈന് അധ്യയനത്തിന്റെ ഫലപ്രാപ്തി അറിയാന് സ്കൂള് തുറന്നാലുടന് പരീക്ഷകള് നടത്തണമെന്നും കുട്ടികളുടെ പ്രകടനം നിശ്ചിത നിലവാരത്തിലെത്തുന്നില്ലെങ്കില് പരിഹാരമായി പ്രത്യേക ബ്രിജ് കോഴ്സുകള് നടത്തണമെന്നും കേന്ദ്ര വിദ്യാഭ്യാസ മന്ത്രാലയം സംസ്ഥാനങ്ങള്ക്കു നിര്ദ്ദേശം നല്കി.
നിലവില് ഡിസംബര് വരെ സ്കൂള് തുറക്കാന് കഴിയില്ലെന്നാണ് വിലയിരുത്തല്. കോവിഡ് ഭീഷണിയെ മറികടന്ന് സ്കൂള് തുറന്നാല് പിന്നീട് അവധി നല്കാതെ എല്ലാദിവസവും ക്ലാസ് നടത്തുന്നത് ആലോചനയിലുണ്ട്.
മേയില് വാര്ഷിക പരീക്ഷ നടത്താനാണ് സാധ്യത. ഓരോ പ്രായത്തിലും വിദ്യാര്ത്ഥി പഠിച്ചിരിക്കേണ്ട കാര്യങ്ങളാണ് സിലബസിലുള്ളത്. ആവശ്യമെന്നു കണ്ടാല് പരീക്ഷയ്ക്ക് നിശ്ചിതഭാഗം ഒഴിവാക്കും. നിലവില് നടന്നുവരുന്ന ഓണ്ലൈന് ക്ലാസുകള് മിക്കവയും മികച്ച നിലവാരം പുലര്ത്തുന്നുണ്ടെങ്കിലും ചില ക്ലാസുകളെക്കുറിച്ച് ഭിന്നാഭിപ്രായമുയര്ന്നിട്ടുണ്ട്. ഇത് പരിഹരിക്കാന് റെക്കോഡ് ചെയ്ത ക്ലാസുകള് വിദഗ്ദ്ധര് വിലയിരുത്തിയശേഷമേ ഇനിമുതല് സംപ്രേഷണം ചെയ്യൂ.
അദ്ധ്യാപകര് അവരുടെ കുട്ടികളുമായി ഓണ്ലൈന് ക്ലാസിന്റെ തുടര്ച്ചയായി ആശയവിനിമയം നടത്തുകയും സംശയം തീര്ത്തുനല്കി പഠിക്കാനുള്ള പ്രേരണ നല്കുകയും വേണം. വിദ്യാഭ്യാസ ഓഫീസര്മാര് ഇക്കാര്യം ഉറപ്പാക്കും.
കേരളത്തിലെ ഡിജിറ്റല് അധ്യയനത്തെക്കുറിച്ചു പഠിക്കാന് നിയോഗിച്ച വിദഗ്ധസമിതിയുടെ റിപ്പോര്ട്ട് കൂടി ലഭിച്ചശേഷം മറ്റുകാര്യങ്ങളില് തീരുമാനമെടുക്കാമെന്ന നിലപാടിലാണു സംസ്ഥാന സര്ക്കാര്. കഴിഞ്ഞ ദിവസം സംസ്ഥാനങ്ങളിലെ വിദ്യാഭ്യാസവകുപ്പ് മേധാവികളുമായി നടത്തിയ വിഡിയോ കോണ്ഫറന്സിലാണു കേന്ദ്രത്തിന്റെ നിര്ദ്ദേശം.അതേസമയം ഈ വര്ഷം നഷ്ടമാകാതിരിക്കാനുള്ള ശ്രമത്തിലാണ് കേന്ദ്ര-സംസ്ഥാന സര്ക്കാരുകള്.