തലസ്ഥാനത്ത് സ്ഥിതി ഗുരുതരം; വിഎസ്എസ്സിയിലെ ജീവനക്കാരന്റെ സമ്പര്ക്കപ്പട്ടിക തയ്യാറാക്കുന്നതില് പ്രയാസം
തിരുവനന്തപുരം: സമ്പര്ക്കത്തിലൂടെയടക്കം നിരവധിപ്പേര്ക്ക് കൊറോണ രോഗബാധയുണ്ടായ തിരുവനന്തപുരത്ത് സ്ഥിതി സങ്കീര്ണമെന്ന് മന്ത്രി കടകംപള്ളി സുരേന്ദ്രന് രംഗത്ത്. നഗരം ഇപ്പോള് അടച്ചിടേണ്ട സാഹചര്യമില്ലെങ്കിലും തലസ്ഥാന നഗരവാസികള് സര്ക്കാര് നിര്ദ്ദേശം പാലിക്കണം. സമ്പര്ക്കത്തിലൂടെയുള്ള മൂന്ന് കേസുകള് കൂടി റിപ്പോര്ട്ട് ചെയ്തതോടെ മണക്കാട് സ്ഥിതി അതീവ ഗുരുതരമാണ്. ഈ പ്രദേശത്തെ കണ്ടെയിന്മെന്റ് സോണുകള് സര്ക്കാര് വിപുലമാക്കും.
വിക്രംസാരാഭായി സ്പേസ് സെന്ററിലെ ജീവനക്കാരന് വൈദ്യുതി ബില് അടയ്ക്കുന്നതിന് പോകുകയും വിവാഹവീട്ടില് സന്ദര്ശിക്കുകയും ചെയ്തിട്ടുണ്ട്. ഇദ്ദേഹം ആരോടൊക്കെയാണ് ബന്ധപ്പെട്ടതെന്ന് കണ്ടെത്തുക പ്രയാസമാണെന്നും കടകംപള്ളി കൂട്ടിച്ചേര്ത്തു. അതേ സമയം നഗരത്തിലെ കൂടുതല് ചന്തകളില് നിയന്ത്രണമേര്പ്പെടുത്തുമെന്ന് തിരുവനന്തപുരം മേയര് അറിയിച്ചു. പാളയം, ചാല ചന്തകള്ക്കൊപ്പം പേരൂര്ക്കട കുമരിചന്ത എന്നിവിടങ്ങളിലും ജനങ്ങള്ക്ക് നിയന്ത്രണത്തോടെ മാത്രമാകും പ്രവേശനമെന്നും മേയര് കെ ശ്രീകുമാര് വ്യക്തമാക്കി.