സാലറി കട്ടിനായി ഓർഡിനൻസ്; തീരുമാനം മന്ത്രിസഭാ യോഗത്തിൽ

News Desk

29 April 2020 12:53 PM

തിരുവനന്തപുരം: സാലറി കട്ട് കോടതി സ്‌റ്റേ ചെയ്തതോടെ അതിനെ മറകിടക്കാനുള്ള ഓര്‍ഡിനന്‍സിന് മന്ത്രിസഭ അംഗീകാരം നല്‍കി. ദുരന്തനിവാരണ നിയമ പ്രകാരമാണ് ഓര്‍ഡിനന്‍സ് പാസാക്കിയത്. കോവിഡ് പ്രതിസന്ധി പരിഹരിക്കാൻ സർക്കാർ ജീവനക്കാരുടെ ശമ്പളം മാറ്റിവെക്കാനുള്ള സർക്കാർ തീരുമാനം നിയമപരമല്ലെന്ന് ഹൈക്കോടതി വിധിച്ചതോടെയാണ് സര്‍ക്കാര്‍ ഓര്‍ഡിനന്‍സ് പാസാക്കാനുള്ള തീരുമാനത്തിലെത്തിയത്.

എന്നാൽ ഓർഡിനൻസ് ഇറക്കി സാലറി കട്ട് നടപ്പാക്കാമെങ്കിലും ഗവർണർ ഒപ്പിടാൻ തയാറാകണമെന്ന കടമ്പടയുണ്ട്. തൊഴിലെടുത്തതിനു ശമ്പളം നൽകാത്തത് ഭരണഘടനയുടെ തന്നെ ലംഘനമാണെന്നു സംഘടനകൾ ചൂണ്ടിക്കാട്ടിയ നിലയ്ക്ക് ഈ കാരണം പറഞ്ഞു ഗവർണർക്ക് ഓർഡിനൻസ് തിരിച്ചയയ്ക്കാം.

കോവിഡ് പശ്ചാത്തലത്തിൽ സർക്കാർ, പൊതുമേഖലാ സ്ഥാപനങ്ങളിലെ ജീവനക്കാരുടെ 6 ദിവസത്തെ വീതം ശമ്പളം 5 മാസത്തേക്കു പിടിക്കാനായിരുന്നു സർക്കാർ ഉത്തരവിറക്കിയത്. എന്നാൽ സർക്കാർ ഉത്തരവ് ഇന്നലെ ഹൈക്കോടതി 2 മാസത്തേക്ക് സ്റ്റേ ചെയ്തു. ശമ്പളം ഔദാര്യമല്ല, ജീവനക്കാരുടെ അവകാശമാണെന്നു കോടതി വ്യക്തമാക്കി. സർക്കാർ ഉത്തരവിനു പ്രഥമദൃഷ്ട്യാ നിയമ പിൻബലമില്ലെന്നും കുറ്റപ്പെടുത്തി. കേസ് മേയ് 20ലേക്കു മാറ്റിയിരിക്കവെയാണ് സർക്കാർ ഇപ്പോൾ ഓർഡിനൻസ് ഇറക്കാൻ തീരുമാനിച്ചിരിക്കുന്നത്.