ഉള്ളിവിലയില് കുതിപ്പ് തുടരുന്നു
മുംബൈ: ഉള്ളിവിലയിലെ കുതിപ്പ് തെരഞ്ഞെടുപ്പില് തിരിച്ചടിയാവാതിരിക്കാനുള്ള ശ്രമത്തില് മഹാരാഷ്ട്ര ബിജെപി. രാജ്യത്ത് ഏറ്റവുമധികം ഉള്ളി ഉത്പാദിപ്പിക്കുന്ന സംസ്ഥാനമായിട്ടും കൂടിയ വിലയാണ് മഹാരാഷ്ട്രയില്. എന്നാല് വില കുറയ്ക്കാനുള്ള നടപടികള് കര്ഷകരെ എതിര്പക്ഷത്താക്കുമോ എന്ന ഭയവും സര്ക്കാരില് നിലനില്ക്കുന്നുണ്ട്.
1998ല് ദില്ലിയിലെ സുഷമ സ്വരാജ് സര്ക്കാരിനെ താഴെ ഇറക്കിയതില് പ്രധാന ഘടകം കൂടിയ ഉള്ളി വിലയ്ക്കെതിരായ ജനരോഷമായിരുന്നു. ഉത്തരേന്ത്യയിലെ സര്ക്കാരുകള് സമാന പ്രതിസന്ധിയിലൂടെ പലതവണ കടന്ന് പോയി. ഉള്ളി കയറ്റുമതിയിലൂടെ ഏറ്റവും കൂടുതല് വരുമാനം ഉണ്ടാക്കുന്ന സംസ്ഥാനങ്ങളില് ഒന്നാണ് മഹാരാഷ്ട്ര.
പക്ഷേ മുന്കാല ചരിത്രങ്ങള് ഇപ്പോള് ഫഡ്നാവിസ് സര്ക്കാരിനെ പേടിയിലാഴ്ത്തുന്നുണ്ടാവാം. ഉള്ളി വില മറ്റെവിടെ ഉയര്ന്നാലും മഹാരാഷ്ട്രയെ അത് ബാധിക്കില്ലെന്നായിരുന്നു ധാരണ. എന്നാല് ഇപ്പോള് കിലോയ്ക്ക് വില അറുപതും കടന്ന് മുന്നേറുകയാണ്. കേന്ദ്ര സര്ക്കാര് ഉള്ളി കയറ്റുമതി ഇപ്പോള് നിരോധിച്ച് വില നിയന്ത്രിക്കാനുള്ള ശ്രമം നടത്തിയത് മഹാരാഷ്ട്ര തെരഞ്ഞെടുപ്പ് കൂടി മുന്നില് കണ്ടാണ്.
എന്നിട്ടും വില കാര്യമായി കുറഞ്ഞിട്ടില്ലെന്നുള്ളതാണ് യാഥാര്ഥ്യം. അതേസമയം ഉള്ളി വില കുറയ്ക്കാന് ശ്രമിക്കുന്നതിനെതിരെ നാസിക്കില് കര്ഷകര് പ്രതിഷേധത്തിനൊരുങ്ങുകയാണ്. വില ഇടിക്കാന് സര്ക്കാര് ശ്രമിച്ചാല് ഉള്ളി വില്പ്പന നടത്തില്ലെന്നാണ് ഇവരുടെ മുന്നറിയിപ്പ്.