ശമ്പളം ലഭിച്ചില്ല; ബിഎസ്എൻഎൽ ജീവനക്കാരൻ ഓഫീസ് കെട്ടിടത്തിൽ തൂങ്ങി മരിച്ചു

News Desk

07 November 2019 01:55 PM

നിലമ്പൂർ : മാസങ്ങളായി ശമ്പളം മുടങ്ങിയതിനെ തുടർന്ന് ബിഎസ്എൻഎൽ കരാർ ജീവനക്കാരൻ തൂങ്ങി മരിച്ചു. വണ്ടൂർ കാപ്പിൽ മച്ചിങ്ങപൊയിൽ സ്വദേശി കുന്നത്ത് വീട്ടിൽ രാമകൃഷ്ണനാണ് (52) നിലമ്പൂർ ബിഎസ്എൻഎൽ ഓഫീസ് കെട്ടിടത്തിൽ തൂങ്ങി മരിച്ചത്. സ്വീപ്പർ ആയിരുന്ന രാമകൃഷ്ണൻ രാവിലെ എട്ടരയോടെ ഓഫീസിൽ എത്തി ജോലി ചെയ്യുന്നതിനടയിൽ ഉദ്യോഗസ്ഥർ പുറത്ത് പോയ സമയം ഓഫീസ് മുറിയിൽ ആത്മഹത്യ ചെയ്യുകയായിരുന്നു.

കഴിഞ്ഞ പത്ത് മാസമായി രാമകൃഷ്ണൻ ഉൾപ്പെടെയുള്ള പലർക്കും ശമ്പളം ലഭിച്ചിട്ടില്ല. കൂടാതെ ആറ് മണിക്കൂർ ജോലി ഒന്നര മണിക്കൂർ ആയി കുറച്ചും ജോലി ദിവസം പതിനഞ്ച് ദിവസമാക്കി കുറച്ചും, പിരിച്ചുവിടാനൊരുങ്ങുകയായിരുന്നു അധികൃതർ. കഴിഞ്ഞ മുപ്പതു വർഷമായി നിലമ്പൂർ ഓഫീസിൽ ജീവനക്കാരനാണ് രാമകൃഷ്ണൻ.