ഓക്സിജന്‍ സിലിണ്ടര്‍ ഉപയോഗിക്കുന്നവര്‍ കൂടുതല്‍ മരങ്ങള്‍ നടണമെന്ന് കങ്കണ റണൗട്ട്
ഇന്ത്യ കോവിഡ് വ്യാപനത്തിന്റെ രണ്ടാം തരംഗത്തില്‍ അതിരൂക്ഷമായപ്രതിസന്ധിയിലൂടെ കടന്നു പോവുകയാണ്. രോഗികളുടെ എണ്ണം കൂടുന്നതിന് അനുസരിച്ച്‌ സഹായം അഭ്യര്‍ത്ഥിച്ചു കൊണ്ടുള്ള നിരവധി സന്ദേശങ്ങളാണ് സമൂഹമാധ്യമങ്ങളില്‍ പ്രചരിക്കുന്നത്. പല സംസ്ഥാനങ്ങളിലും ഓക്സിജന്‍ ക്ഷാമം രൂക്ഷമായി തുടരുകയുമാണ്. ഇന്ത്യയില്‍ ആവശ്യത്തിന് മെഡിക്കല്‍ ഓക്സിജന്‍ ഉണ്ടെന്ന് ആഭ്യന്തര മന്ത്രാലയം കഴിഞ്ഞ തിങ്കളാഴ്ച പറഞ്ഞെങ്കിലും ഓക്സിജന്‍ ഉത്പാദിപ്പിക്കുന്ന സംസ്ഥാനങ്ങളില്‍ നിന്ന് ആവശ്യക്കാര്‍ കൂടുതലുള്ള സ്ഥലങ്ങളിലേക്ക് അത് എത്തിക്കുന്ന കാര്യത്തിലാണ് വലിയ പ്രതിസന്ധി നിലനില്‍ക്കുന്നത്.
സമൂഹമാധ്യമങ്ങളില്‍ ഓക്സിജന്‍ സിലിണ്ടര്‍ സംഭാവന നല്‍കുകയും വേണ്ട സഹായം രോഗികളിലേക്ക് എത്തിക്കുകയും ചെയ്യുന്ന ആളുകളുടെ വാര്‍ത്തകള്‍ നിറയുമ്ബോള്‍ ബോളിവുഡ് നടി കങ്കണ റണൗട്ടിന് വ്യത്യസ്തമായ അഭിപ്രായമാണ് ഇതിനെക്കുറിച്ചെല്ലാം ഉള്ളത്. ഓക്സിജന്‍ സിലിണ്ടറുകള്‍ ഉപയോഗിക്കുന്നവരും ഓക്സിജന്‍ പ്ലാന്റുകള്‍ നിര്‍മിക്കുന്നവരും തിരിച്ച്‌ പ്രകൃതിയ്ക്ക് അതിന്റെ പങ്ക് കൂടി നല്‍കണമെന്നാണ് നടി പറയുന്നത്.
"എല്ലാവരും കൂടുതല്‍ ഓക്സിജന്‍ പ്ലാന്റുകള്‍ നിര്‍മിക്കുകയും ടണ്‍ കണക്കിന് ഓക്സിജന്‍ സിലിണ്ടറുകള്‍ ഉപയോഗിക്കുകയും ചെയ്യുന്നു. പ്രകൃതിയില്‍ നിന്ന് ബലം പ്രയോഗിച്ച്‌ ഓക്സിജന്‍ എടുക്കുന്നതിന് നമ്മള്‍ എങ്ങനെയാണ് നഷ്ടപരിഹാരം നല്‍കാന്‍ പോകുന്നത്? നമ്മുടെ അബദ്ധങ്ങളില്‍ നിന്നും അവ ഉണ്ടാക്കുന്ന ദുരന്തങ്ങളില്‍ നിന്നും നമ്മള്‍ ഒന്നും പഠിക്കുന്നില്ലെന്ന് വേണം കരുതാന്‍" എന്നാണ് കങ്കണറണാവത്ത് ട്വിറ്ററില്‍ എഴുതിയത്. #PlantTrees എന്ന ഹാഷ്ടാഗോടു കൂടിയാണ് കങ്കണ ട്വീറ്റ് പങ്കുവെച്ചത്.
"മനുഷ്യര്‍ക്ക് വീണ്ടും വീണ്ടും ഓക്സിജന്‍ നല്‍കുന്നതോടൊപ്പം പ്രകൃതിയ്ക്ക് വേണ്ടിയുള്ള ആശ്വാസപദ്ധതികളും ഗവണ്മെന്റ് പ്രഖ്യാപിക്കണം. ഈ ഓക്സിജന്‍ ഉപയോഗിക്കുന്ന മനുഷ്യര്‍ വായുവിന്റെ ഗുണനിലവാരം മെച്ചപ്പെടുത്താന്‍ പ്രതിജ്ഞാബദ്ധരായിരിക്കണം. പ്രകൃതിയില്‍ നിന്ന് എല്ലാം സ്വീകരിക്കുകയും ഒന്നും തിരിച്ചു കൊടുക്കാതിരിക്കുകയും ചെയ്യുന്ന ഉപദ്രവകാരികളായി നമ്മള്‍ എത്ര കാലം തുടരും?", കങ്കണ കൂട്ടിച്ചേര്‍ത്തു.
Related News
നടി കങ്കണ റണാവത്തിന് കൊവിഡ്
കങ്കണ റണാവത്തിന് എതിരെ വാറണ്ട്