ഹാത്രസ് കേസ് അന്വേഷണത്തിന് ഹൈക്കോടതി മേല്നോട്ടം; ഉത്തരവിട്ട് സുപ്രീംകോടതി
ന്യൂഡല്ഹി: ഉത്തര്പ്രദേശിലെ ഹാത്രസില് ദളിത് പെണ്കുട്ടി കൂട്ടബലാത്സംഗത്തിനിരയായി കൊല്ലപ്പെട്ട കേസിലെ സിബിഐ അന്വേഷണത്തില് ഹൈക്കോടതി മേല്നോട്ടം വഹിക്കണമെന്നു സുപ്രീംകോടതി. ചീഫ് ജസ്റ്റീസ് എസ്.എ ബോബ്ഡെ അധ്യക്ഷനായ ബെഞ്ചിന്റെയാണു തീരുമാനം.
അലഹബാദ് ഹൈക്കോടതിക്കാവും കേസിലെ മേല്നോട്ട ചുമതല. കേസ് സിബിഐ ഏറ്റെടുത്തിട്ടുണ്ട്. ഇനി അവര് അന്വേഷണ പുരോഗതി റിപ്പോര്ട്ട് അലഹാബാദ് ഹൈകോടതിയില് സമര്പ്പിക്കണമെന്നും സുപ്രീംകോടതി ഉത്തരവിട്ടു.
സിബിഐയോ എസ്ഐടിയോ കോടതിയുടെ മേല്നോട്ടത്തില് അന്വേഷിക്കണമെന്ന ഹര്ജികളിലാണ് സുപ്രീം കോടതി ചൊവ്വാഴ്ച വിധിപറഞ്ഞത്. കോടതി മേല്നോട്ടത്തില് അന്വേഷണം വേണമെന്ന് ആവശ്യപ്പെട്ട് സാമൂഹിക പ്രവര്ത്തക സത്യമ ദുബെയാണ് പൊതുതാത്പര്യ ഹര്ജി നല്കിയത്.
ഉത്തര്പ്രദേശില് നീതിയുക്തമായ വിചാരണ നടക്കില്ലെന്നും അതിനാല് ഡല്ഹിയിലെ കോടതിയിലേക്ക് കേസ് മാറ്റണമെന്നു പെണ്കുട്ടിയുടെ കുടുംബം ആവശ്യപ്പെട്ടിരുന്നു. ഇതിനുപുറമേ കേസിന്റെ വിചാരണ യുപിയില്നിന്ന് ഡല്ഹിയിലേക്ക് മാറ്റണമെന്ന് ആവശ്യപ്പെട്ടുള്ള ഹര്ജികളും സുപ്രീംകോടതിയുടെ പരിഗണനയിലാണ്.