വ്യാജ ചാനല് റേറ്റിങ്: അര്ണബ് ഗോസ്വാമിയുടെ റിപബ്ലിക് ടിവിക്കെതിരെ പൊലീസ് അന്വേഷണം
ടെലിവിഷന് ചാനല് റേറ്റിങ് അര്ണബ് ഗോസ്വാമിയുടെ റിപബ്ലിക് ടിവി അടക്കം മൂന്ന് ചാനലുകള് കൃത്രിമം വരുത്തിയതായി മുംബൈ പൊലീസിന്റെ വെളിപ്പെടുത്തല്. രണ്ട് ചാനല് ഉടമകളെ അറസ്റ്റ് ചെയ്ത പൊലീസ് റിപബ്ലിക് ടിവിക്ക് നോട്ടീസ് അയച്ചു.
ടെലിവിഷന് റേറ്റിങ് കണക്കാക്കുന്നതിന് ബ്രോഡ്കാസ്റ്റ് ഓഡിയന്സ് റിസര്ച്ച് കൗണ്സില് (ബാര്ക്ക്) ഏര്പ്പെടുത്തിയ ബാരാമോറ്ററില് റിപബ്ലികിന് അനുകൂലമായി കൃത്രിമം വരുത്തിയെന്നാണ് മുംബൈ പൊലീസ് കണ്ടെത്തിയത്. മുംബൈയില് ഈ വിവര ശേഖരണത്തിനായി 2000 ബാരോമീറ്ററുകളാണ് സ്ഥാപിച്ചിട്ടുള്ളത്. ഇത് സ്ഥാപിക്കുന്ന കേന്ദ്രങ്ങള് രഹസ്യമായി സൂക്ഷിക്കണം എന്നാണ് വ്യവസ്ഥ. അത് മറികടന്ന് കൃത്രിമം നടത്തിയെന്നാണ് മുംബൈ പൊലീസിന്റെ അന്വേഷണത്തില് കണ്ടെത്തിയത്.
ബാരോമീറ്റര് സ്ഥാപിക്കുന്നതിനായി ബാര്ക്ക് കരാര് നല്കിയ സ്ഥാപനത്തിലെ മുന് ജീവനക്കാരെ സ്വാധീനിച്ചാണ് ഈ കൃത്രിമം എന്ന്് കണ്ടെത്തിയതായി മുംബൈ പൊലീസ് കമ്മീഷണര് പരം ബീര് സിങ് വെളിപ്പെടുത്തി.
ചില പ്രത്യേക ചാനലുകള് സ്ഥിരമായി കാണുന്നതിന് ആളുകളോട് അവര് നിര്ദേശിച്ചു. ഇംഗ്ലീഷ് അറിയാത്ത ആളുകളോട് പോലും ഇംഗ്ലീഷ് ചാനലുകള് കാണാന് അവര് നിര്ദേശം നല്കിയതായും പൊലീസ് അന്വേഷണത്തില് വ്യക്തമായി.
റിപബ്ലിക് ടിവി, ഫക്ത് മറാത്തി, ബോക്സ് സിനിമ എന്നീ ചാനലുകളാണ് തട്ടിപ്പിന് പിന്നില്. രണ്ട് ചാനലുകളുടെ ഉടമകളെ അറസ്റ്റ് ചെയ്തതായും റിപബ്ലിക് ടിവിക്ക് നോട്ടീസ് നല്കിയതായും കമ്മീഷണര് പരം ബീര് സിങ് അറിയിച്ചു. ഈ വ്യാജ ടിആര്പി നിരക്കുകള് കാണിച്ചാണ് ടെലിവിഷന് ചാനലുകള് വലിയ തോതില് പരസ്യം പിടിക്കുന്നതെന്നും പൊലീസ് പറഞ്ഞു. പരസ്യ വിപണിയില് ഏറ്റവും പ്രധാനമാണ് ബാര്ക്ക് നിരക്കുകള്.
പൊലീസിസിന്റെ കണ്ടെത്തലിനെ നിയമ പരമായി നേരിടുമെന്ന് റിപബ്ലിക് ടിവി പ്രതികരിച്ചു. മുംബൈ പൊലീസിനെതിരെ മാനനഷ്ടക്കേസ് കൊടുക്കുമെന്ന് റിപബ്ലിക് ടിവി എഡിറ്റര് ഇന് ചീഫ് അര്ണബ് ഗോസ്വാമി പ്രതികരിച്ചു. സുശാന്ത് സിങ് രജപുത്തിന്റെ മരണം അന്വേഷിച്ചതില് മുംബൈ പൊലീസിനെ വിമര്ശിച്ചതിനുള്ള പ്രതികാരമായാണ് ഈ കേസ് എന്ന് അര്ണബ് ഗോസ്വാമി ആരോപിച്ചു.