പോള് മുത്തൂറ്റ് വധക്കേസിലെ എട്ട് പ്രതികളെ ഹൈക്കോടതി വെറുതെവിട്ടു
കൊച്ചി: ഏറെ വിവാദമായ പോള് എം. ജോര്ജ്ജ് മുത്തൂറ്റിനെ കൊലപ്പെടുത്തിയ കേസിലെ എട്ട് പ്രതികളുടെ വധശിക്ഷ ഹൈക്കോടതി റദ്ദാക്കി. ഒന്നാം പ്രതി ജയചന്ദ്രന്, മൂന്ന് മുതല് എട്ട് വരെയുള്ള പ്രതികളായ സത്താര്, സുജിത്, ആകാശ്, ഫൈസല്, രാജീവ് കുമാര്, ഷിനോ പോള് എന്നിവരെയാണ് കോടതി വെറുതെവിട്ടത്. രണ്ടാം പ്രതി കാരി സതീഷര് അപ്പീല് നല്കാത്തതിനാല് ഇയാള് ജയിലില് തുടരും.
ഇവര് കുറ്റകൃത്യത്തില് നേരിട്ട് പങ്കെടുത്തിട്ടില്ലെന്ന് നിരീക്ഷിച്ചാണ് കോടതിയുടെ നടപടി. 2009 ഓഗസ്റ്റ് 21നാണ് മുത്തൂറ്റ് കുടുംബാംഗമായ പോള് ആലപ്പുഴ-ചങ്ങനാശ്ശേരി റോഡില് പൊങ്ക ജംഗ്ഷന് സമീപം കൊല്ലപ്പെടുന്നത്. ആലപ്പുഴയില് ക്വട്ടേഷന് ആക്രമണത്തിനായി പോകുകയായിരുന്ന പ്രതികള് സഞ്ചരിച്ച വാഹനവുമായി പോളിന്റെ കാര് ഇടിച്ചതിനെ തുടര്ന്നുണ്ടായ വാഹനാപകടത്തെത്തുടര്ന്ന് കാറില് നിന്നും പിടിച്ചിറക്കി കുത്തിക്കൊലപ്പെടുത്തുകയായിരുന്നു.
അന്ന് തെളിവിനായി പൊലിസ് 'എസ്' ആകൃതിയിലുള്ള കത്തി പ്രതിയുടെ വീട്ടില് ഒളിപ്പിച്ചതുള്പ്പെടയുള്ള സംഭവങ്ങള് ഏറെ വിവാദമായിരുന്നു. പോളിനൊപ്പം കാറിലുണ്ടായിരുന്ന കുപ്രസിദ്ധ ഗുണ്ടകളായ പുത്തന്പാലം രാജേഷ്, ഓംപ്രകാശം എന്നിവരെ മാപ്പുസാക്ഷികളാക്കുകയും ചെയ്തു. പിന്നീട് 2010ല് കേസന്വേഷണം സി.ബി.ഐക്ക് വിടുകയായിരുന്നു. 2015ലാണ് കേസിലെ ഒന്പത് പ്രതികള്ക്ക് സി.ബി.ഐ പ്രത്യേക കോടതി ജീവപര്യന്തം തടവും ശിക്ഷയും വിധിച്ചത്.