കൊവിഡ് ബാധിതരുടെ ഡേറ്റ ചോര്ന്നതില് സൈബര് സെല് വിവരങ്ങള് ശേഖരിക്കുന്നു
കാസര്കോട്: കൊവിഡ് ബാധിതരുടെ ഡേറ്റകള് ചോര്ന്ന സംഭവത്തില് സൈബര് സെല് വിവരങ്ങള് ശേഖരിച്ചു തുടങ്ങി. കാസര്കോട് ഡി.എം.ഒ നല്കിയ പരാതിയില് കാസര്കോട് സൈബര് സെല്ലിന്റെ സഹായത്തോടെയാണ് അന്വേഷണം നടത്തുകയെന്ന് ജില്ലാ പൊലീസ് മേധാവി പി.എസ് സാബു അറിയിച്ചു. സംഭവത്തില് വിശദമായ അന്വേഷണം ആവശ്യപ്പെട്ട് ജില്ലാ മെഡിക്കല് ഓഫീസര് (ഹെല്ത്ത്) ഡോ. എ.വി രാംദാസ് ജില്ലാ പൊലീസ് മേധാവിക്ക് കത്ത് നല്കിയതിനെ തുടര്ന്നാണ് പൊലീസ് അന്വേഷണം ആരംഭിച്ചത്. കൊവിഡ് രോഗികളില് നിന്നോ രോഗമുക്തരായവരില് നിന്നോ ഇതു സംബന്ധിച്ച പരാതികളൊന്നും ഇതുവരെ ലഭിച്ചിട്ടില്ല.
എന്നാല് മാധ്യമ വാര്ത്തകളെ തുടര്ന്ന് സംഭവത്തിന്റെ നിജസ്ഥിതി അറിയുന്നതിനാണ് അന്വേഷണത്തിന് അഭ്യര്ത്ഥിച്ചിരിക്കുന്നതെന്ന് ഡി.എം.ഒ അറിയിച്ചു. അതേസമയം ബംഗളൂരു അസ്ഥാനമായി പ്രവര്ത്തിക്കുന്ന സ്വകാര്യ കമ്പനിയാണ് ഇതിന് പിന്നിലെന്നാണ് വിവരം പുറത്തുവന്നിരിക്കുന്നത്. ഈ സ്വകാര്യ കമ്പനി പ്രതിനിധികളാണ് വിവരങ്ങള് ആരാഞ്ഞ് രോഗികളെ വിളിച്ചതെന്നാണ് കണ്ടെത്തല്. അതേസമയം രോഗികളുടെ വിവരങ്ങള് പുറത്ത് വന്നതില് അത്ഭുതമില്ലെന്നും വിവരങ്ങള് വച്ച് മുതലെടുപ്പിന് ആരേയും അനുവദിക്കില്ലെന്നും ആരോഗ്യ മന്ത്രി കെ.കെ ശൈലജ പറഞ്ഞു. അതിനിടെ കാസര്കോട് ജില്ലയിലെ ഡേറ്റകള് ചോര്ന്നത് സംബന്ധിച്ച് ജില്ലാ ഭരണകൂടവും കൂടുതല് അന്വേഷണം നടത്തി വരികയാണ്. കൊവിഡ് രോഗം ഭേദമായി വീട്ടിലേക്ക് മടങ്ങിയ ചിലരെ തുടര് ചികിത്സ വാഗ്ദാനം ചെയ്ത് ബംഗളുരുവിലെ സ്വകാര്യ ആശുപത്രികള് ബന്ധപ്പെട്ടതാണ് വിവാദമായത്.