തടഞ്ഞുവെച്ച 10 ഇന്ത്യന് സൈനികരെ ചൈന വിട്ടയച്ചു
ലഡാക്കിലെ ഗാല്വന് താഴ്വരയിലെ ആക്രമണത്തിനിടെ ചൈന പിടികൂടിയിരുന്ന പത്ത് ഇന്ത്യന് സൈനികരെ വിട്ടയച്ചു. ഒരു ലഫ്റ്റനന്റ് കേണല്, മൂന്ന് മേജര്മാര് എന്നിവരുള്പ്പെടുന്ന സംഘത്തെയാണ് ചൈന വിട്ടയച്ചിരിക്കുന്നത്. കഴിഞ്ഞദിവസം വൈകീട്ട് അഞ്ചുമണിയോടെയായിരുന്നു മോചനമെന്ന് ദി ഹിന്ദു പോര്ട്ടല് തങ്ങളുടെ സോഴ്സുകളെ അവലംബിച്ച് റിപ്പോര്ട്ട് ചെയ്യുന്നു. മേജര് ജനറല് തലത്തില് ഇരുകൂട്ടരും നടത്തിയ ചര്ച്ചകള്ക്കൊടുവിലാണ് സൈനികരെ വിട്ടയയ്ക്കാന് ചൈന സമ്മതിച്ചത്. റിപ്പോര്ട്ട് പ്രകാരം ഈ സൈനികര് ഉപദ്രവിക്കപ്പെട്ടിട്ടില്ല.
ഈ സംഭവത്തില് ഇന്ത്യന് സൈനികരെയാരെയും കാണാതായിട്ടില്ലെന്ന് സൈന്യം പിന്നീടിറക്കിയ വാര്ത്താക്കുറിപ്പില് വ്യക്തമാക്കി. 20 ഇന്ത്യന് സൈനികര് കൊല്ലപ്പെട്ട ആക്രമണത്തിനിടയിലാണ് ചൈന പത്തുപേരെ തടഞ്ഞുവെച്ചത്.
അതെസമയം ചൈനീസ് ആക്രമണം നേരിടുമ്ബോള് ഇന്ത്യന് സൈനികരുടെ പക്കല് ആയുധങ്ങളില്ലാതിരുന്നത് എന്തുകൊണ്ടെന്ന ചോദ്യം ശക്തമായി ഉയരുന്നുണ്ട്. കോണ്ഗ്രസ്സാണ് ഈ പ്രശ്നം ഉന്നയിക്കുന്നത്. ഇത്രയും വലിയ ആക്രമണം നടന്നിട്ടും എന്തുകൊണ്ടാണ് ഇന്ത്യന് സൈന്യം വെടിവെയ്ക്കാതിരുന്നതെന്ന ചോദ്യവുമായി പഞ്ചാബ് മുഖ്യമന്ത്രി അമരീന്ദര് സിങ്ങും രംഗത്തുണ്ട്.
1996ലെ കരാര് പ്രകാരം ഇത്തരം സന്ദര്ഭങ്ങളില് സായുധരാകരുതെന്നുണ്ടെന്നാണ് വിദേശകാര്യമന്ത്രി എസ് ജയ്ശങ്കര് പറയുന്നത്. എന്നാല് ഈ വിശദീകരണം മുന് നോര്ത്തേണ് ആര്മി കമാന്ഡറായിരുന്ന ലഫ്. ജനറല് എച്ച്എസ് പനാഗ് തള്ളിക്കളയുന്നു. 1996ലെ കരാര് അതിര്ത്തി മാനേജ്മെന്റുമായി ബന്ധപ്പെട്ടതാണ്. അത് തന്ത്രപരമായ ഒരു സൈനിക സാഹചര്യത്തെ നേരിടാനുള്ളതല്ല. അതിര്ത്തിയിലെ സൈനികരുടെ ജീവന് ഭീഷണിയുള്ള സന്ദര്ഭത്തില് സ്ഥലത്തുള്ള കമാന്ഡര്ക്ക് എല്ലാത്തരം ആയുധങ്ങളും ഉപയോഗിക്കാവുന്നതാണെന്ന് അദ്ദേഹം ചൂണ്ടിക്കാട്ടി.