അട്ടപ്പാടിയില് കോവിഡ് നിരീക്ഷണത്തിലായിരുന്ന യുവാവ് മരിച്ചു
പാലക്കാട്: അട്ടപ്പാടിയില് കോവിഡ് നിരീക്ഷണത്തിലായിരുന്ന യുവാവ് പനി ബാധിച്ച് മരിച്ചു. അട്ടപ്പാടി ഷോളയൂര് പഞ്ചായത്തിലെ വരഗംപാടി ഊരില് വെള്ളിങ്കിരിയുടെ മകന് കാര്ത്തിക് (23) ആണ് വെള്ളിയാഴ്ച പുലര്ച്ചെ മരിച്ചത്. കഴിഞ്ഞ മാസം 28ന് തമിഴ്നാട്ടിലെ കോയമ്പത്തൂര്, പൂണ്ടിയിലുള്ള ബന്ധുവിന്റെ സംസ്ക്കാര ചടങ്ങില് പങ്കെടുക്കാന് മൂലഗംഗല് വഴിയുള്ള കാനന പാതയിലൂടെ നടന്ന് പോയിരുന്നു. 29 ന് തിരികെ കാട്ടിലൂടെ നടന്ന് വരഗംപാടിയിലെത്തിയ കാര്ത്തിക് വീട്ടില് നിരീക്ഷണത്തില് കഴിയുകയായിരുന്നു.
ബുധനാഴ്ച പകല് പനിയും വയറിളക്കവും ശാരീരിക അസ്വസ്ഥതയും മൂലം കോട്ടത്തറ ട്രൈബല് സ്പെഷ്യാലിറ്റി ആശുപത്രിയില് പ്രവേശിപ്പിച്ചു. പിന്നീട് രോഗം മൂര്ഛിച്ചതോടെ പെരിന്തല്മണ്ണയിലെ ഇഎംഎസ് ആശുപത്രിയിലേക്ക് കൊണ്ടുപോയി. അവിടെ നിന്നും മഞ്ചേരി മെഡിക്കല് കോളേജിലേക്ക് മാറ്റുന്നതിനിടെയാണ് മരിച്ചത്. ഇയാളുടെ ശ്രവം കോവിഡ് പരിശോധനക്കായി അയച്ചു. മൃതദേഹം മഞ്ചേരി മെഡിക്കല് കോളേജ് മേര്ച്ചറിയില് സൂക്ഷിച്ചിരിക്കുകയാണ്.