വാട്ട്സ്ആപ്പ് നിരോധിക്കണമെന്ന പൊതുതാൽപര്യ ഹർജി സുപ്രീം കോടതി തള്ളി
രാജ്യത്തെ വാട്സ്ആപ്പിന്റെ പ്രവർത്തനവും ഉപയോഗവും നിരോധിക്കാൻ കേന്ദ്രസർക്കാരിനോട് നിർദേശിക്കണമെന്ന് ആവശ്യപ്പെട്ടുള്ള പൊതുതാൽപര്യ ഹർജി സുപ്രീം കോടതി തള്ളി . മലയാളിയായ സോഫ്റ്റ്വെയർ എഞ്ചിനീയർ കെ ജി ഓമനക്കുട്ടനാണ് സുപ്രീം കോടതിയിൽ പൊതുതാൽപര്യ ഹർജി സമർപ്പിച്ചത്. “ഫോട്ടോകളും വീഡിയോകളും പങ്കിടാൻ ഉപയോഗിക്കുന്ന വാട്ട്സ്ആപ്പ് ആപ്ലിക്കേഷന്റെ മാനേജ്മെൻ്റ് കേന്ദ്ര സർക്കാരിന്റെ ഇൻഫർമേഷൻ ടെക്നോളജി (ഡിജിറ്റൽ മീഡിയ എത്തിക്സ് ആക്ട്) മാനദണ്ഡങ്ങൾ പാലിക്കാൻ വിസമ്മതിച്ചു.
ഭരണഘടനയുടെ ആർട്ടിക്കിൾ 21 പ്രകാരം പൗരന്മാരുടെ മൗലികാവകാശങ്ങൾ വാട്സ്ആപ്പ് ലംഘിക്കുകയാണ്. അത് രാജ്യക്ഷേമത്തിനും രാജ്യസുരക്ഷയ്ക്കും ഭീഷണിയാണ്. അതുകൊണ്ട് തന്നെ സാങ്കേതിക വിദ്യയിൽ മാറ്റം വരുത്താനും കേന്ദ്ര സർക്കാരുമായി സഹകരിക്കാനും തയ്യാറല്ലെങ്കിൽ വാട്സ്ആപ്പിനെ ഇന്ത്യയിൽ പ്രവർത്തിക്കാൻ അനുവദിക്കരുത്. രാജ്യതാത്പര്യത്തിന് വിരുദ്ധമായി നിരവധി വെബ്സൈറ്റുകളും സെൽഫോൺ ആപ്പുകളും കേന്ദ്രസർക്കാർ നിരോധിച്ചു. അതുപോലെ തന്നെ ഇന്ത്യയിൽ വാട്സ്ആപ്പിന്റെ പ്രവർത്തനവും ഉപയോഗവും നിരോധിക്കാൻ കേന്ദ്രസർക്കാരിനോട് ഉത്തരവിടണം”.
ഇതാണ് അദ്ദേഹം ഹർജിയിൽ പറഞ്ഞിരുന്നത്. ജസ്റ്റിസുമാരായ എംഎം സുന്ദരേഷ്, അരവിന്ദ് കുമാർ എന്നിവരടങ്ങിയ ബെഞ്ചിന് മുമ്പാകെയാണ് ഹർജി വന്നത്. ഈ ഹർജി സ്വീകരിക്കാൻ താൽപര്യമില്ലെന്ന് പറഞ്ഞ കോടതി ഹർജി തള്ളുകയായിരുന്നു.
ഇതാദ്യമായല്ല ഓമനക്കുട്ടൻ ഈ വിഷയം ഉന്നയിക്കുന്നത്. സർക്കാർ പുറപ്പെടുവിച്ച ഉത്തരവുകൾ പാലിക്കുന്നില്ലെങ്കിൽ വാട്ട്സ്ആപ്പ് നിരോധിക്കാൻ കേന്ദ്ര സർക്കാരിനോട് നിർദേശിക്കണമെന്ന് ആവശ്യപ്പെട്ട് ഇദ്ദേഹം 2021-ൽ കേരള ഹൈക്കോടതിയെ സമീപിച്ചിരുന്നു. കേരള ഹൈക്കോടതി ഹർജി തള്ളിക്കളഞ്ഞു.
Related News
വന്ദേഭാരത് ട്രെയിൻ ഓട്ടോയിൽ ഇടിച്ചു
പൊന്നിന്റെ വില സർവകാല റെക്കോർഡിലേക്ക്, ഒരു പവൻ സ്വര്ണം വാങ്ങാൻ ഒരു ലക്ഷത്തിലേറെ
വാളയാർ ആൾക്കൂട്ട കൊല; രണ്ട് പേർ കൂടി അറസ്റ്റിൽ
ആലപ്പുഴ, കോട്ടയം ജില്ലകളിൽ പക്ഷിപ്പനി
