നല്ലളം ഗവ. ഹൈസ്കൂൾ കെട്ടിടം ഉദ്ഘാടനം ചെയ്തു

മതനിരപേക്ഷതയാണ് രാജ്യത്തിന്റെ പ്രത്യേകതയെന്നും മതസാഹോദര്യം നിലനിർത്തുന്ന നിലയിൽ ജനാധിപത്യ വിദ്യാഭ്യാസക്രമം സംസ്ഥാനത്ത് നടപ്പാക്കാനാണ് സർക്കാർ ഉദ്ദേശിക്കുന്നതെന്നും വിനോദസഞ്ചാര, പൊതുമരാമത്ത് വകുപ്പ് മന്ത്രി പി എ മുഹമ്മദ്‌ റിയാസ്. നല്ലളം ഗവ. ഹൈസ്കൂളിൽ കിഫ്‌ബി പദ്ധതിയിൽ ഉൾപ്പെടുത്തി നിർമ്മിച്ച കെട്ടിടത്തിന്റെ ഉദ്ഘാടനം നിർവഹിച്ചു സംസാരിക്കുകയായിരുന്നു മന്ത്രി.

പൊതുവിദ്യാഭ്യാസ സംരക്ഷണ യജ്ഞത്തിന്റെ ഭാഗമായി അടിസ്ഥാന സൗകര്യം മെച്ചപ്പെടുത്താൻ 141 സ്കൂളുകൾക്ക് അഞ്ചു കോടി വീതവും 386 സ്കൂളുകൾക്ക് മൂന്ന് കോടി രൂപ വീതവും 446 സ്കൂളുകൾക്ക് ഒരു കോടി രൂപ വീതവും കിഫ്‌ബി ധനസഹായം അനുവദിച്ചിട്ടുണ്ടെന്ന് മന്ത്രി പറഞ്ഞു. സംസ്ഥാനത്തെ ക്ലാസ് മുറികളെല്ലാം ഹൈടെക്കായി. സംസ്ഥാനത്തെ 14 ജില്ലകളിൽ നിന്നും ഓരോ വിദ്യാലയത്തെ വീതം തെരഞ്ഞെടുത്ത് ആ സ്കൂളുകളുടെ അടിസ്ഥാന സൗകര്യ വികസനം മെച്ചപ്പെടുത്തുന്നതിനോടൊപ്പം കുട്ടികളുടെ അക്കാദമിക മികവ് കൂടി ഉയർത്തുക എന്ന ലക്ഷ്യത്തോടെ ‘മോഡൽ സ്കൂൾ പദ്ധതി’ നടപ്പാക്കുമെന്നും മന്ത്രി പറഞ്ഞു.

മണ്ഡലത്തിലെ ജയന്തി റോഡിന് ഒരു കോടി 45 ലക്ഷം രൂപയും ശാരദ മന്ദിരം റോഡിന് രണ്ടുകോടി 90 ലക്ഷം രൂപയും സർക്കാർ അനുവദിച്ചതായി മന്ത്രി പറഞ്ഞു.

മേയർ ബീന ഫിലിപ്പ് അധ്യക്ഷത വഹിച്ചു. പൊതുവിദ്യാഭ്യാസ സംരക്ഷണത്തിന്റെ ഭാഗമായി മൂന്ന് കോടി രൂപ ചെലവിലാണ് കെട്ടിട നിർമ്മാണം പൂർത്തീകരിച്ചത്. മൂന്ന് ക്ലാസ് മുറികൾ, ഐടി ലാബ്, സെമിനാർ ഹാൾ, ടോയ്‌ലറ്റ് സമുച്ചയം എന്നിവ ഉൾപ്പെടുന്നതാണ് പുതിയ കെട്ടിടം.

ചടങ്ങിൽ ഹെഡ്മിസ്ട്രസ് പി യമുന റിപ്പോർട്ടും ഇൻകെൽ പ്രതിനിധി ഷാനിദ പദ്ധതി റിപ്പോർട്ടും അവതരിപ്പിച്ചു. കോർപ്പറേഷൻ പൊതുമരാമത്ത് സ്റ്റാൻഡിങ് കമ്മിറ്റി ചെയർമാൻ പി സി രാജൻ, കൗൺസിലർമാരായ റഫീന അൻവർ, മൈമൂന ടീച്ചർ എസ്.എം.സി ചെയർമാൻ കെ ഷലീൽ, എം.പി.ടി.എ പ്രസിഡന്റ്‌ ഹാത്തിക്കാബി, സ്റ്റാഫ് സെക്രട്ടറി വി വി സുരേഷ് ബാബു എന്നിവർ സംസാരിച്ചു. പി.ടി.എ പ്രസിഡന്റ്‌ കെ പി സഹീർ സ്വാഗതവും വൈസ് പ്രസിഡന്റ്‌ എം വി ജാഹിഷ് നന്ദിയും പറഞ്ഞു.