ഒഡിഷയിൽ നവീൻ യുഗത്തിന്‌ അന്ത്യം ; ബിജെപി അധികാരം പിടിച്ചു

കാൽനൂറ്റാണ്ടുനീണ്ട നവീൻ പട്‌നായിക്‌ ഭരണത്തിന്‌ തിരശ്ശീലയിട്ട്‌ ഒഡിഷ.  ബിജു ജനതാദൾ സർക്കാരിനെ അട്ടിമറിച്ച്‌ ഒഡിഷയില്‍ ബിജെപി അധികാരം പിടിച്ചു. 147 അംഗ നിയമസഭയിൽ 78 സീറ്റിൽ ബിജെപി ജയിച്ചപ്പോൾ ബിജെഡി 51ലേയ്ക്ക്‌ കൂപ്പുകുത്തി. മുൻ നിയമസഭയിൽ ബിജെഡിക്ക്‌ 112 അംഗങ്ങളുണ്ടായിരുന്നു. കോൺഗ്രസ്‌ ഒമ്പതിൽനിന്ന്‌ 14ലേക്ക്‌ ഉയർന്നപ്പോൾ സിറ്റിങ്‌ സീറ്റായ ബൊനായി സിപിഐ എം കോട്ടയായി തുടർന്നു. പാർടി സ്ഥാനാർഥി ലക്ഷ്‌മൺ മുണ്ട 23,000 വോട്ടിന്റെ ഭൂരിപക്ഷത്തിൽ ബിജെഡിയുടെ ഭീംസെൻ ചൗധരിയെ വീഴ്‌ത്തി.  ഹിൻജിൻ മണ്ഡലത്തിൽ മുഖ്യമന്ത്രി നവീൻ പട്‌നായിക്‌ നാലായിരത്തോളം വോട്ടിന്റെ ഭൂരിപക്ഷത്തിലാണ്‌ രക്ഷപെട്ടത്‌.  കേന്ദ്രമന്ത്രി ധർമേന്ദ്ര പ്രധാൻ ബിജെപി മുഖ്യമന്ത്രിയാകാനാണ് സാധ്യത. അദ്ദേഹം സംബൽപുരിൽനിന്ന്‌ ലോക്‌സഭയിലേക്ക് ജയിച്ചിട്ടുണ്ട്. ലോക്‌സഭാ തെരഞ്ഞെടുപ്പില്‍ ആകെയുള്ള 21 സീറ്റിൽ 19 ഇടത്തും ബിജെപി ജയിച്ചപ്പോൾ ബിജെഡി ഒന്നിലൊതുങ്ങി. ഏക സിറ്റിങ്‌ മണ്ഡലമായ കൊരാപുതിൽമാത്രം കോൺഗ്രസ്‌ ജയിച്ചു.