മാവേലിക്കര കിട്ടാക്കനി അല്ല, വിജയം ഉറപ്പ്; എല്‍ഡിഎഫ് സ്ഥാനാര്‍ത്ഥി സി എ അരുണ്‍കുമാര്‍

മാവേലിക്കരയില്‍ വിജയം ഉറപ്പെന്ന് എല്‍ഡിഎഫ് സ്ഥാനാര്‍ത്ഥി സി എ അരുണ്‍കുമാര്‍. സിപിഐയുടെ ഔദ്യോഗിക പ്രഖ്യാപനം വന്നതിന് പിന്നാലെയാണ് അരുണ്‍ കുമാറിന്റെ പ്രതികരണം. എതിര്‍സ്ഥാനാര്‍ഥി ആരായാലും പ്രശ്‌നം ഇല്ലെന്നും മാവേലിക്കരയിലെ വികസന മുരടിപ്പ് അടക്കം ചര്‍ച്ചയാക്കുമെന്നും അരുണ്‍ കുമാര്‍ പറഞ്ഞു. മാവേലിക്കര കിട്ടാക്കനി അല്ലെന്നും അരുണ്‍കുമാര്‍.

മാവേലിക്കരയില്‍ കോണ്‍ഗ്രസിന്റെ സിറ്റിങ്ങ് സീറ്റില്‍ ഇത്തവണ സിപിഐയ്ക്ക് വിജയസാധ്യതയുണ്ടെന്ന പ്രവചനങ്ങള്‍ ശക്തമായ സാഹചര്യത്തില്‍ യുവ നേതാവായ സി എ അരുണ്‍ കുമാറിനെയാണ് സിപിഐ രംഗത്തിറക്കിയിരിക്കുന്നത്. മണ്ഡലത്തിന്റെ പരിധിയില്‍ വരുന്ന മൂന്ന് ജില്ലാ കൗണ്‍സിലുകളില്‍ കോട്ടയം, കൊല്ലം ജില്ലാ കൗണ്‍സിലുകള്‍ സി എ അരുണ്‍ കുമാറിനെ പരിഗണിച്ചിരുന്നില്ല. ചിറ്റയം ഗോപകുമാര്‍, പ്രീജാ ശശിധരന്‍, കെ അജിത്, ആര്‍ എസ് അനില്‍ തുടങ്ങിയവരുടെ പേരുകളാണ് രണ്ട് ജില്ലാ കൗണ്‍സിലുകളുടെയും പാനലില്‍ ഉണ്ടായിരുന്നത്. പാര്‍ട്ടി ചര്‍ച്ച ചെയ്യുന്നതിന് മുന്‍പ് പേര് പുറത്ത് വന്നു എന്ന് ചൂണ്ടിക്കാട്ടിയാണ് കോട്ടയം ജില്ലാ കൗണ്‍സിലുകളില്‍ അരുണിന്റെ പേര് ചര്‍ച്ചക്ക് വരാതിരുന്നത്. എന്നാല്‍ ആലപ്പുഴ ജില്ലാ കൗണ്‍സില്‍ അതേ ജില്ലക്കാരന്‍ എന്ന നിലയില്‍ അരുണിന്റെ പേര് ഒന്നാമതായി ഉള്‍പ്പെടുത്തുകയായിരുന്നു. സംസ്ഥാന കൗണ്‍സിലിലും സി എ അരുണ്‍ കുമാറിന്റെ സ്ഥാനാര്‍ത്ഥിത്വവുമായി ബന്ധപ്പെട്ട് ശക്തമായ ചര്‍ച്ചയും അഭിപ്രായ വ്യത്യാസവും ഉയര്‍ന്നിരുന്നു.