കേന്ദ്രസർക്കാർ മൂർദാബാദ്, അമിത് ഷാ മൂർദാബാദ് എന്ന് വിളിച്ചാൽ കേസെടുക്കാൻ ആകില്ല; രൂക്ഷ വിമർശനവുമായി ബോംബെ ഹൈക്കോടതി

കേന്ദ്ര സർക്കാരിന്റെ തീരുമാനങ്ങൾക്കെതിരെയും നയങ്ങൾക്കെതിരെയും പ്രതിഷേധിക്കുന്നവർക്കെതിരെ കേസെടുക്കുന്ന പോലീസ് നടപടിയെ രൂക്ഷമായ ഭാഷയിൽ വിമർശിച്ച് ബോംബെ ഹൈക്കോടതി. പോലീസ് എന്നത് മുഖ്യമന്ത്രിയുടെയോ പ്രധാനമന്ത്രിയുടെയോ സേവകരല്ലെന്നും, അവർ ജനങ്ങളുടെ സേവകരാണെന്നും കോടതി ഓർമ്മിപ്പിച്ചു. ഒരു എസ്‌ഡിപിഐ (SDPI) പ്രവർത്തകൻ സമർപ്പിച്ച ഹർജിയിലാണ് ജസ്റ്റിസ് മാധവ് ജാംദാർ അധ്യക്ഷനായ ബെഞ്ചിന്റെ അതിശക്തമായ ഇടപെടൽ.

കേന്ദ്ര സർക്കാരിന്റെ തീരുമാനങ്ങൾക്കെതിരെ സമാധാനപരമായി പ്രതിഷേധിക്കാൻ രാജ്യത്തെ ഓരോ പൗരനും ഭരണഘടനാപരമായ അവകാശമില്ലേയെന്ന് കോടതി പോലീസിനോട് ചോദിച്ചു. "കേന്ദ്രസർക്കാർ മൂർദാബാദ്, അമിത് ഷാ മൂർദാബാദ് എന്ന് വിളിച്ചതിന്റെ പേരിൽ മാത്രം ഒരാൾക്കെതിരെ കേസെടുക്കാൻ നിയമപരമായി സാധിക്കില്ല. വെറും മുദ്രാവാക്യം വിളിച്ചതിനെ തുടർന്ന് ഒരാളെ നാടുകടത്തുന്നത് പോലുള്ള കടുത്ത നടപടികളിലേക്ക് കടക്കാൻ പോലീസിന് എങ്ങനെ കഴിഞ്ഞു? പൗരന്മാർക്ക് പ്രതിഷേധിക്കാനുള്ള അവകാശം ഇവിടെ നിഷേധിക്കപ്പെടുകയാണോ?"