ഇന്ത്യന്‍ ഡോറി; അറബിക്കടലില്‍ പുതിയ ആഴക്കടല്‍ മത്സ്യത്തെ കണ്ടെത്തി സിഎംഎഫ്ആര്‍ഐ

കേരള തീരത്തിന് അഭിമാനമായി അറബിക്കടലിൽ നിന്ന് പുതിയ ഇനം ആഴക്കടൽ മത്സ്യത്തെ കേന്ദ്ര സമുദ്രമത്സ്യ ഗവേഷണ സ്ഥാപനം (സിഎംഎഫ്ആർഐ) കണ്ടെത്തി. ലക്ഷദ്വീപ് കടലിന്റെ കിഴക്കൻ മേഖലയിൽ 350 മുതൽ 500 മീറ്റർ വരെ ആഴമുള്ള ഭാഗത്താണ് ഇവയുടെ സാന്നിധ്യം കണ്ടെത്തിയത്. കൊല്ലം ശക്തികുളങ്ങര ഹാർബറിൽ എത്തിയ ആഴക്കടൽ ട്രോളിംഗ് ബോട്ടുകളിൽ നിന്നാണ് ഗവേഷണത്തിനാവശ്യമായ ആറ് മത്സ്യങ്ങളെ സിഎംഎഫ്ആർഐ ശാസ്ത്രജ്ഞർക്ക് ലഭിച്ചത്.

പൊതുവെ 'ഇന്ത്യൻ ഡോറി' എന്ന് വിളിക്കുന്ന ഈ മത്സ്യത്തിന് ‘സിറ്റോപ്സിസ് ഇൻഡിക്ക’ (Cyttopsis indica) എന്നാണ് ശാസ്ത്രീയ നാമം നൽകിയിരിക്കുന്നത്. സിഎംഎഫ്ആർഐയിലെ ഡോ. ആർ. രതീഷ് കുമാറിന്റെ നേതൃത്വത്തിലുള്ള ഗവേഷക സംഘമാണ് ഈ നിർണ്ണായക കണ്ടെത്തലിന് പിന്നിൽ പ്രവർത്തിച്ചത്.

പരമ്പരാഗത ശാസ്ത്രീയ വർഗ്ഗീകരണ രീതികളും അത്യാധുനിക ഡിഎൻഎ (DNA) പരിശോധനയും സംയോജിപ്പിച്ചാണ് ഇത് പുതിയ ഇനം മീനാണെന്ന് ഗവേഷകർ ഉറപ്പുവരുത്തിയത്. ഇതുവരെ ഇന്ത്യൻ മഹാസമുദ്രത്തിൽ കാണപ്പെടുന്ന ഇത്തരത്തിലുള്ള മത്സ്യങ്ങൾ അറ്റ്‌ലാന്റിക് സമുദ്രത്തിൽ കാണപ്പെടുന്ന ‘സിറ്റോപ്‌സിസ് റോസിയ’ എന്ന വിഭാഗത്തിൽപ്പെട്ടതാണെന്നാണ് ശാസ്ത്രലോകം കരുതിയിരുന്നത്. എന്നാൽ പുതിയ പരിശോധനയിലൂടെ ഇവയുടെ ജനിതകഘടന അറ്റ്‌ലാന്റിക് ഇനങ്ങളിൽ നിന്ന് തികച്ചും വ്യത്യസ്തമാണെന്ന് കണ്ടെത്തുകയായിരുന്നു.

പ്രമുഖ ശാസ്ത്ര മാസികയായ 'ഇന്ത്യൻ ജേണൽ ഓഫ് ഫിഷറീസിൽ' ഈ പഠനവിവരം പ്രസിദ്ധീകരിച്ചിട്ടുണ്ട്. ഇന്ത്യയുടെ തെക്കുപടിഞ്ഞാറൻ തീരങ്ങളിലെ ആഴക്കടലിൽ ഇനിയും കണ്ടെത്താത്ത വലിയൊരു സമുദ്ര ജൈവവൈവിധ്യം ഒളിഞ്ഞിരിപ്പുണ്ടെന്ന ശക്തമായ സൂചനയാണ് ഈ പുതിയ കണ്ടെത്തൽ നൽകുന്നത്.