‘ജാത്തിരെ’കാലാവസ്ഥാ ഉച്ചകോടിക്ക് 23 ന് തുടക്കം

ജില്ലയിൽ കാലാവസ്ഥാ ഉച്ചകോടി ‘ജാത്തിരെ’ക്ക് ഫെബ്രുവരി 23 ന് തുടക്കമാവും. ജില്ലാ പഞ്ചായത്തിന്റെ ആഭിമുഖ്യത്തിൽ മീനങ്ങാടിയിൽ സംഘടിപ്പിക്കുന്ന ഉച്ചകോടിയിൽ ജൈവ വൈവിധ്യ കാർഷിക പ്രദർശന-വിപണന മേള നടക്കും. തദ്ദേശ സ്വയംഭരണ സ്ഥാപനങ്ങൾ, വിവിധ സർക്കാർ വകുപ്പുകൾ, കാർഷിക കൂട്ടായ്മകൾ, കർഷക സംഘടനകൾ എന്നിവരുടെ സഹകരണത്തോടെ സംഘടിപ്പിക്കുന്ന മേളയിൽ വയനാട് കാർബൺ നോട്ട് റിപ്പോർട്ടിന്റെ പ്രകാശനം, കാർഷിക മേഖല, കാലാവസ്ഥ വ്യതിയാനം എന്നീ വിഷയങ്ങളിൽ സെമിനാറുകൾ, സ്റ്റുഡൻസ് കോൺഫറൻസ്, തനത് കലാരൂപങ്ങളുടെ പ്രദർശനം, മോഡൽ ബി.എം.സികളുടെ അവതരണം, സാംസ്‌കാരിക സന്ധ്യ എന്നിവ അരങ്ങേറും. മൂന്ന് ദിവസം നീണ്ട് നിൽക്കുന്ന ഉച്ചകോടിയിൽ കാലാവസ്ഥ വ്യതിയാനവുമായി ബന്ധപ്പെട്ട് ജില്ലയിലെ കാർഷിക രംഗത്തെ മാറ്റങ്ങളും അതിജീവനവും ചർച്ചയാകും.

കാലാവസ്ഥാ ഉച്ചകോടിയുടെ ഭാഗമായി ജില്ലാ-സംസ്ഥാന-ഇതര സംസ്ഥാനങ്ങളിലെയും കർഷകരുടെയും കാർഷിക ഉത്പന്നങ്ങളുടെ പ്രദർശനവും വിത്ത്, തൈകൾ എന്നിവയുടെ വിൽപനയും നടക്കും. 23 ന് രാവിലെ 10 ന് കൃഷി വകുപ്പ് മന്ത്രി പി. പ്രസാദ് കാലാവാസ്ഥ ഉച്ചകോടി ഉദ്ഘാടനം ചെയ്യും. രാഹുൽ ഗാന്ധി എം.പി മുഖ്യാതിഥിയാകുന്ന പരിപാടിയിൽ എം.എൽ.എ ഐ.സി ബാലകൃഷ്ണൻ, ജില്ലാ പഞ്ചായത്ത് പ്രസിഡന്റ് സംഷാദ് മരക്കാർ, ത്രിതല പഞ്ചായത്ത് ഭരണസമിതി അംഗങ്ങൾ, ജനപ്രതിനിധികൾ എന്നിവർ പങ്കെടുക്കും.