39ാം സംസ്ഥാന ടെക്നിക്കൽ ഹൈസ്കൂൾ കായികമേളക്ക് സമാരംഭം

നെടുമങ്ങാട് സർക്കാർ ടെക്നിക്കൽ ഹൈസ്കൂളിന്റെ മേൽ നോട്ടത്തിൽ സംഘടിപ്പിച്ചിരിക്കുന്ന 39 മത് സംസ്ഥാന ടെക്നിക്കൽ ഹൈസ്കൂൾ കായിക മേളയുടെ ഉദ്ഘാടനം തിരുവനന്തപുരം യൂണിവേഴ്സിറ്റി സ്റ്റേഡിയത്തിൽ ഉന്നത വിദ്യാഭ്യാസ സാമൂഹ്യ നീതി വകുപ്പ് മന്ത്രി ഡോ: ആർ . ബിന്ദു പതാക ഉയർത്തി നിർവ്വഹിച്ചു. ഭക്ഷ്യ പൊതു വിതരണ വകുപ്പ് മന്ത്രി അഡ്വ: ജി.ആർ അനിൽ അധ്യക്ഷനായി.
പുതിയ കായിക സംസ്കാരം ഉയർത്തി പിടിക്കുന്ന സമൂഹം സൃഷ്ടിക്കാനാണ് സർക്കാർ ശ്രമിക്കുന്നതെന്ന് ഉദ്ഘാടന പ്രസംഗത്തിൽ മന്ത്രി ആർ ബിന്ദു പറഞ്ഞു. കായിക താരങ്ങൾ അണി നിരന്ന വർണ്ണാഭമായ മാർച്ച് പാസ്റ്റിൽ ടെക്നിക്കൽ ഹൈസ്ക്കൂൾ തൃശൂർ ഒന്നാം സ്ഥാനവും യഥാക്രമം ടെക്നിക്കൽ ഹൈസ്കൂൾ വെസ്റ്റ്ഹിൽ കോഴിക്കോട് , കുളത്തൂർ തിരുവനന്തപുരം തുടങ്ങിയവർ രണ്ടും മൂന്നും സ്ഥാനങ്ങൾ നേടി .കായിക താരങ്ങൾക്കുള്ള പ്രതിജ്ഞ ദേശീയ ഫുട്ബോൾ ടീം അംഗം ശ്രീ സി.കെ . വിനീത് ചൊല്ലി കൊടുത്തു. നെടുമങ്ങാട് മുനിസിപ്പൽ ചെയർപേഴ്സൺ ശ്രീമതി സി.എസ്.ശ്രീജ, സാങ്കേതിക വിദ്യാഭ്യാസ വകുപ്പ് ഡയറക്ടർ ഡോ: രാജശ്രീ എം എസ് , മേളയുടെ ജനറൽ കൺവീനർ നെടുമങ്ങാട് ടി എച്ച് എസ് സൂപ്രണ്ട് ബിന്ദു. ആർ തുടങ്ങിയവർ ആശംസ പ്രസംഗം നടത്തി. ശനിയും ഞായറുമായി വിവിധ കായിക മത്സരങ്ങൾ അരങ്ങേറും . ഞായർ വൈകിട്ട് 3 മണിക്ക് നടക്കുന്ന സമാപന സമ്മേളനത്തോടെ മേളക്ക് കൊടിയിറങ്ങും. സംസ്ഥാനത്തെ 39 സർക്കാർ ടെക്നിക്കൽ ഹൈസ്കൂളുകൾ 9 ഐ എച്ച് ആർ ഡി സ്കൂളുകൾ എന്നിവയിൽ നിന്ന് ആയിരത്തോളം പ്രതിഭകൾ പങ്കെടുക്കുന്നു .