തീപിടിച്ചെന്ന ഭീതി; യാത്രക്കാര്‍ ജനശതാബ്ദി ചെയിൻ വലിച്ചുനിര്‍ത്തി

ഷൊർണൂർ: തീ പിടിച്ചെന്ന ഭീതിയില്‍ യാത്രക്കാർ ജനശതാബ്ദി എക്സ്പ്രസ് ട്രെയിൻ ചെയിൻ വലിച്ചു നിർത്തിച്ചു. ഉച്ചയ്ക്ക് 1.45-ന് കോഴിക്കോട് നിന്ന് പുറപ്പെട്ട കോഴിക്കോട്- തിരുവനന്തപുരം ജനശതാബ്ദി (12075) എക്സ്പ്രസാണ് നിർത്തിച്ചത്.


ഷൊർണൂരിന് മുമ്ബത്തെ സ്റ്റേഷനായ കാരക്കാട് പിന്നിട്ടപ്പോഴായിരുന്നു സംഭവം. കാരക്കാടിനും ഷൊർണൂരിനുമിടയില്‍ റെയില്‍വെ ട്രാക്കില്‍ പണി നടക്കുന്നുണ്ടായിരുന്നു. കാരക്കാട് പിന്നിട്ടപ്പോള്‍ ട്രെയിനിന്റെ ഭൂരിഭാഗം കോച്ചുകളിലേക്കും ഇരുവശത്ത് നിന്നും പൊടി അടിച്ചു കയറി. കാഴ്ച മറക്കുന്ന നിലയില്‍ പൊടി കോച്ചിലേക്ക് കയറിയതോടെ പുകയാണെന്ന് തെറ്റിദ്ധരിച്ച്‌ പരിഭ്രാന്തരായ യാത്രക്കാർ ചെയിൻ വലിക്കുകയായിരുന്നുവെന്നാണ് വിവരം. ട്രെയിൻ ജീവനക്കാർ എത്തി പ്രശ്നം പരിഹരിച്ച ശേഷം യാത്ര തുടർന്നു.