സോപ്പ് പൊടി ഉപയോഗിച്ച് 2.3 കോടി ലിറ്റര് വ്യാജപ്പാല്; മഹാരാഷ്ട്രയില് വന് തട്ടിപ്പ്
മഹാരാഷ്ട്രയിലെ ധാരാശിവ് ജില്ലയിലുള്ള ഭൂം താലൂക്കിൽ നടന്ന വൻ വ്യാജപ്പാൽ നിർമ്മാണവുമായി ബന്ധപ്പെട്ട് പോലീസും ഫുഡ് ആൻഡ് ഡ്രഗ് അഡ്മിനിസ്ട്രേഷനും (FDA) നടത്തിയ അന്വേഷണത്തിൽ ഞെട്ടിക്കുന്ന വിവരങ്ങൾ പുറത്ത്.…
മഹാരാഷ്ട്രയിലെ ധാരാശിവ് ജില്ലയിലുള്ള ഭൂം താലൂക്കിൽ നടന്ന വൻ വ്യാജപ്പാൽ നിർമ്മാണവുമായി ബന്ധപ്പെട്ട് പോലീസും ഫുഡ് ആൻഡ് ഡ്രഗ് അഡ്മിനിസ്ട്രേഷനും (FDA) നടത്തിയ അന്വേഷണത്തിൽ ഞെട്ടിക്കുന്ന വിവരങ്ങൾ പുറത്ത്. കഴിഞ്ഞ ആറ് മാസത്തിനിടെ ഈ മേഖലയിൽ നിന്ന് ഏകദേശം 2.3 കോടിയിലധികം ലിറ്ററോളം വ്യാജപ്പാൽ വിപണിയിൽ എത്തിയതായാണ് കണ്ടെത്തൽ. മൃഗങ്ങൾക്കുള്ള തീറ്റ വിൽപ്പനയുടെ മറവിലായിരുന്നു ഈ വലിയ തട്ടിപ്പ് നടന്നിരുന്നത്.
പ്രതികളിൽ നിന്ന് പിടിച്ചെടുത്ത രേഖകൾ പ്രകാരം, ഗുണനിലവാരമില്ലാത്ത 2.3 ലക്ഷത്തിലധികം കിലോഗ്രാം പാൽപൊടി ഉപയോഗിച്ച് 23 ലക്ഷത്തിലേറെ ലിറ്ററോളം കൃത്രിമ പാൽ ഇവർ നിർമ്മിച്ചു. ഇതിന് വിപണിയിൽ 9.21 കോടി രൂപയോളം വിലവരും. 100 ലിറ്ററോളം ശുദ്ധമായ പാലിൽ 10 ലിറ്ററോളം കൃത്രിമ പാൽ (10% അനുപാതത്തിൽ) എന്ന തോതിലാണ് ഇവർ കലർത്തിയിരുന്നത്. ഈ മലിനമായ പാലാണ് പാൽ ശേഖരണ കേന്ദ്രങ്ങൾ വഴി മഹാരാഷ്ട്രയുടെ വിവിധ ഭാഗങ്ങളിലേക്ക് വിതരണം ചെയ്തത്.
കൃത്രിമ പാൽ യഥാർത്ഥ പാലാണെന്ന് തോന്നിപ്പിക്കാനും കൊഴുപ്പ് കൂട്ടാനുമായി ഡിറ്റർജന്റ് പൗഡർ, പാം ഓയിൽ, വീര്യം കുറഞ്ഞ മറ്റ് കെമിക്കൽ പൗഡറുകൾ എന്നിവയാണ് പ്രതികൾ ചേർത്തിരുന്നത്. സംഭവത്തിൽ 7 പേർക്കെതിരെ കേസ് രജിസ്റ്റർ ചെയ്തിട്ടുണ്ടെങ്കിലും എട്ട് ദിവസമായിട്ടും പ്രതികളെ പിടികൂടാൻ പോലീസിന് കഴിഞ്ഞിട്ടില്ല. ഇവർക്കായി പ്രത്യേക അന്വേഷണ സംഘം രൂപീകരിച്ച് തിരച്ചിൽ തുടരുകയാണ്.
ഡിറ്റർജന്റും പാം ഓയിലും അടങ്ങിയ ഈ വ്യാജപ്പാൽ തുടർച്ചയായി കഴിക്കുന്നത് കരൾ, വൃക്ക, ദഹനവ്യവസ്ഥ എന്നിവയെ ഗുരുതരമായി ബാധിക്കുമെന്നും കുട്ടികളുടെയും ഗർഭിണികളുടെയും ജീവന് വരെ ഭീഷണിയാണെന്നും ആരോഗ്യവിദഗ്ദ്ധർ മുന്നറിയിപ്പ് നൽകുന്നു. ഭക്ഷ്യ സുരക്ഷാ നിയമപ്രകാരം ഇത്തരം കുറ്റകൃത്യങ്ങളിൽ ഏർപ്പെടുന്നവർക്ക് 10 ലക്ഷം രൂപ വരെ പിഴയും ജീവപര്യന്തം തടവും ലഭിക്കാം.
