കൊച്ചിക്ക് ഇനി പുതിയ മുഖം; വൈറ്റില മേല്പാലം മുഖ്യമന്ത്രി നാടിന് സമര്പ്പിച്ചു
കൊച്ചി: വൈറ്റില മേല്പ്പാലം മുഖ്യമന്ത്രി പിണറായി വിജയന് നാടിന് സമര്പ്പിച്ചു. 11ഓടെ കുണ്ടന്നൂര് മേല്പ്പാലവും തുറന്നു നല്കും.ഓണ്ലൈനായാണ് മുഖ്യമന്ത്രി ഉദ്ഘാടനം നിര്വഹിച്ചത്.
മുടങ്ങി കിടന്ന ഒരു പദ്ധതി സമയബന്ധിതമായി പൂര്ത്തിയാക്കി നാടിന് സമര്പ്പിക്കാന് കഴിഞ്ഞതിന്റെ അഭിമാനവുമുണ്ടെന്ന് വൈറ്റില മേല്പ്പാലം ഉദ്ഘാടനം ചെയ്തുകൊണ്ട് മുഖ്യമന്ത്രി പറഞ്ഞു. നിരവധി പ്രതിസന്ധികളുണ്ടായിട്ടും വളരെ വേഗത്തില് തന്നെ പാലങ്ങളുടെ പണി പൂര്ത്തീകരിക്കാന് സര്ക്കാരിനു സാധിച്ചുവെന്നും അഭിമാനാര്ഹമായ നേട്ടമാണിതെന്നും മുഖ്യമന്ത്രി വ്യക്തമാക്കി. ഉദ്ഘാടന ചടങ്ങിനിടെ വി ഫോര് കൊച്ചിയെ മുഖ്യമന്ത്രി വിമര്ശിച്ചു. പാലാരിവട്ടംപാലം തകര്ന്നപ്പോള് പ്രതികരിക്കാതിരുന്നവരാണിവര്. കുത്തിത്തിരിപ്പ് ഉണ്ടാക്കി ശ്രദ്ധനേടാന് ശ്രമിച്ചു. പ്രതിസന്ധി ഘട്ടങ്ങളില് ഇക്കൂട്ടരെ കണ്ടില്ലെന്നും മുഖ്യമന്ത്രി കുറ്റപ്പെടുത്തി. മികവോടെ വികസനം പൂര്ത്തിയാക്കിയതില് ചിലര്ക്ക് അസ്വസ്ഥതയാണെന്നും ജനകീയവാദികള് എന്ന് നടിക്കുന്നവരുടെ കുബുദ്ധി പുറത്തുവന്നുവെന്നും അദ്ദേഹം കൂട്ടിച്ചേര്ത്തു.
പൊതുമരാമത്ത് വകുപ്പ് മന്ത്രി ചടങ്ങില് ജി. സുധാകരന് അധ്യക്ഷത വഹിച്ചു. ധനകാര്യവകുപ്പ് മന്ത്രി ടി.എം. തോമസ് ഐസക്ക് ചടങ്ങുകളില് മുഖ്യാതിതിഥിയാണ്. വളരെ സന്തോഷം തോന്നുന്ന നിമിഷമാണെന്നും സഹകരിച്ച എല്ലാവര്ക്കും നന്ദിയുണ്ടെന്നും മന്ത്രി ജി.സുധാകരന് ഉദ്ഘാടനത്തിന് മുന്നോടിയായി മാധ്യമങ്ങളോട് പറഞ്ഞു.
വേഗത്തില് പണി പൂര്ത്തിയാക്കാന് സാധിച്ചതും അനുവദിച്ച തുകയേക്കാള് കുറഞ്ഞ ചിലവില് പണി പൂര്ത്തിയാക്കാന് സാധിച്ചതും മുഖ്യമന്ത്രി പിണറായി വിജയന്റെ പ്രയത്നമാണ്. തന്നേക്കാള് കൂടുതല് അദ്ദേഹമാണ് ഇതില് പ്രയത്നിച്ചതെന്നും സുധാകരന് പറഞ്ഞു.
ഇരുപാലങ്ങളുടെയും ഭാരപരിശോധകള് ഉള്പ്പെടെയുള്ള സുരക്ഷാനടപടികള് പൂര്ത്തിയാക്കിയതിന് ശേഷമാണ് പാലം ഗതാഗതത്തിനായി തുറന്നു നല്കുന്നത്. മേല്പ്പാലങ്ങള് തുറക്കുന്നതോടെ സംസ്ഥാനത്തെ തന്നെ ഏറ്റവും തിരക്കേറിയം ജംഗ്ഷനുകളിലൊന്നായ വൈറ്റിലയിലുള്പ്പെടെ അനുഭവപ്പെടുന്ന ഗതാഗതക്കുരുക്കിന് പരിഹാരമാകും.