'ഭരണഘടന - പ്രതീക്ഷയും പ്രതിരോധവും' സെമിനാർ നാളെ തിരുവനന്തപുരം പ്രസ് ക്ലബ് ഹാളിൽ

News Desk

03 January 2020 02:10 PM

'ഭരണഘടന - പ്രതീക്ഷയും പ്രതിരോധവും' സെമിനാർ നാളെ (2020 ജ്യനുവരി 4 ശനിയാഴ്ച ) തിരുവനന്തപുരം പ്രസ് ക്ലബ് ഹാളിൽ നടക്കും. കേരള ഗസറ്റഡ് ഓഫീസേഴ്സ് അസോസിയേഷൻ, നിയമ വിദ്യാർത്ഥികൾ എന്നിവരുമായി സഹകരിച്ചു കൊണ്ട് കേരള ശാസ്ത്ര സാഹിത്യ പരിഷത്ത് സെമിനാർ സംഘടിപ്പിച്ചിരിക്കുന്നത്. ഡോ.എൻ.കെ.ജയകുമാർ ( നിയമം), ഡോ.ജെ.പ്രഭാഷ് (രാഷ്ട്രീയം), എം.സരിതാവർമ്മ ,അസിസ്റ്റന്റ് എഡിറ്റർ ഫിനാൻഷ്യൽ എക്സ്പ്രസ്സ് (സാമൂഹികം) തുടങ്ങിയവർ വിഷയം അവതരിപ്പിക്കും. പ്രൊഫ: എ സുഹൃത് കുമാർ മോഡറേറ്ററാവും.

'' ഇന്ത്യൻ ജനാധിപത്യo അത്യന്തം അപകടകരമായ അവസ്ഥയിലൂടെയാണ് കടന്നു പോയിക്കൊണ്ടിരിക്കുന്നത്. നമ്മുടെ രാഷ്ട്രത്തിന്റെ രൂപീകരണം, വികാസം, സ്വാതന്ത്ര്യം, ജനാധിപത്യം, മതേതരത്വം, പൗരവകാശങ്ങൾ എന്നിവയുടെയെല്ലാം അടിത്തറയായ ഇന്ത്യൻഭരണഘടനയുടെ തായ് വേരറുക്കുന്ന ഭരണകൂട തീരുമാനങ്ങളാണ് തുടരെത്തുടരെ ഉണ്ടാകുന്നത്. മതേതര രാഷ്ട്രത്തെ അസ്ഥിരപ്പെടുത്താനുള്ള ഇന്ത്യൻ ഫാസിസത്തിന്റെ രാഷ്ട്രീയ അജണ്ടയാണ് പരസ്യമായിത്തന്നെ ഇന്ന് നടപ്പിലാക്കുന്നത്. പ്രശ്നത്തിന്റെ വിവിധ തലങ്ങൾ ആഴത്തിൽ ബോധ്യപ്പെട്ടു കൊണ്ടേ പ്രതിരോധം സാധ്യമാവുകയുള്ളൂ. ദേശീയ പൗരത്വ ഭേദഗതി നിയമമുൾപ്പടെയുള്ള ഭരണഘടനാ ലംഘനങ്ങൾക്കെതിരെ ശക്തമായ ഒരു പ്രതികരണം കൂടിയായാണ് ഈ സെമിനാർ സംഘടിപ്പിക്കുന്നത് എന്ന് ജില്ലാ സെക്രട്ടറി അഭിപ്രായപ്പെട്ടു.

By

സിന്ധു പ്രഭാകരൻ