കോവാക്സിന് കുട്ടികളില് പരീക്ഷിക്കാന് അനുമതി
ന്യൂഡല്ഹി: ഇന്ത്യയുടെ തദ്ദേശ വാക്സീനായ, ഭാരത് ബയോടെക്കിന്റെ കോവാക്സിന് രണ്ടു മുതല് 18 വയസ്സുവരെയുള്ളവരില് ക്ലിനിക്കല് ട്രയലിന് സബ്ജക്ട് എക്സ്പര്ട്ട് കമ്മിറ്റി അനുമതി നല്കി. രണ്ടാം ഘട്ടത്തിന്റെ ഫലം അറിഞ്ഞ ശേഷമേ മൂന്നാം ഘട്ടം തുടങ്ങാവൂ എന്നു നിര്ദേശമുണ്ട്.
12- 15 പ്രായക്കാരായ കുട്ടികള്ക്കു ഫൈസര് വാക്സീന് നല്കാന് കാനഡയ്ക്കു പിന്നാലെ യുഎസും അനുമതി നല്കി. നാളെ മുതല് നല്കിത്തുടങ്ങുമെന്നാണു സൂചന. 16 വയസ്സിനു മുകളിലുള്ളവര്ക്കു നേരത്തെ തന്നെ പല രാജ്യങ്ങളും ഫൈസര് വാക്സീന് നല്കിത്തുടങ്ങിയിരുന്നു.1216 പ്രായക്കാരില് ആദ്യം അനുമതി നല്കിയതു കാനഡയാണ്.മുതിര്ന്നവര്ക്കുള്ള അതേ ഡോസ് തന്നെയാണു കുട്ടികള്ക്കും.
അതേസമയം വാക്സീന് ഇന്ത്യയില് ലഭ്യമാക്കാനുള്ള താല്പര്യം ഫൈസര് അറിയിച്ചിട്ടുണ്ടെങ്കിലും കുട്ടികള്ക്കു നല്കാനുള്ള ആലോചനയിലേക്കു കടന്നിട്ടില്ലെന്ന് ആരോഗ്യമന്ത്രാലയം സൂചിപ്പിച്ചു. മൂന്നാം കോവിഡ് തരംഗമുണ്ടായാല് അത് ഏറെ ബാധിക്കുക കുട്ടികളെയാണെന്ന മുന്നറിയിപ്പു നിലനില്ക്കെയാണിത്. രണ്ടാം തരംഗം കുട്ടികളെ കൂടുതലായി ബാധിക്കുന്നെന്ന ആരോപണം ഇന്നലെയും ആരോഗ്യമന്ത്രാലയം നിഷേധിച്ചു.
ഇന്ത്യയുടെ കോവാക്സിന് കുട്ടികളിലെ ട്രയല് നടപടികളിലേക്കു കടന്നെങ്കിലും കോവിഷീല്ഡ് ഈ ഘട്ടത്തിലേക്കു കടന്നിട്ടില്ല.