ആലപ്പുഴ-കണ്ണൂർ എക്സിക്യൂട്ടീവ് എക്സ്പ്രസിന്റെ ഷോർണ്ണൂർ ജംഗ്ഷനിലെ സമയം മാറ്റി ക്രമീകരിക്കണം; കെ. സുധാകരന്‍ എം പി

News Desk

25 July 2019 11:44 AM

ആലപ്പുഴ -കണ്ണൂർ എക്സിക്യുട്ടീവ് എക്സ്പ്രസ്സിന്റെ (16307) ഷൊർണ്ണൂർ ജംഗ്ഷനിലെ കണ്ണൂരിലേക്കുള്ള പുറപ്പെടൽ സമയം വൈകിട്ട് 7.5ന്(19:05) എന്നുള്ളത് പുന:ക്രമീകരിച്ച് 7.20ന് പുറപ്പെടുന്ന രൂപത്തിൽ ക്രമീകരിക്കണമെന്ന് ആവശ്യപ്പെട്ട് കണ്ണൂർ എംപി കെ സുധാകരൻ കേന്ദ്ര റെയിൽവേ മന്ത്രി പിയൂഷ് ഗോയലിന് നിവേദനം നൽകി.

നിലവിൽ കോയമ്പത്തൂർ ജംഗ്ഷനിൽ നിന്നും (സിബിഇ) കണ്ണൂരിലേക്ക് (സിഎഎൻ) വൈകുന്നേരങ്ങളിൽ നേരിട്ടുള്ള ട്രെയിനുകൾ ഇല്ലാത്ത സാഹചര്യത്തിൽ കോയമ്പത്തൂർ മേഖലയിലെ ജോലി കഴിഞ്ഞ് നാട്ടിലേക്ക് മടങ്ങുന്ന യാത്രക്കാർക്ക് കണ്ണൂരിലേക്കുള്ള കണക്ഷൻ ട്രെയിനുകൾ കണ്ടെത്തുന്നതിനായി ഷൊർണ്ണൂരിൽ ഇറങ്ങി എക്സിക്യുട്ടീവിന് കയറുകയാണ് പോംവഴി.

സാധാരണയായി കോയമ്പത്തൂർ-തൃശ്ശൂർ ട്രെയിനിൽ കയറിവരുന്ന യാത്രക്കാരിൽ കണ്ണൂരിലേക്ക് വരേണ്ടവർ രണ്ട് ട്രെയിനും ഒരേ സമയത്ത് ഷൊർണ്ണൂരിൽ എത്തിച്ചേരുന്നത് കൊണ്ട് ആലപ്പുഴ -കണ്ണൂർ എക്സിക്യുട്ടീവ് ട്രെയിനിൽ കയറാൻ ഏറെ ബുദ്ധിമുട്ട് അനുഭവിക്കുന്നുണ്ട്. 2016 വരെ എക്സിക്യൂട്ടീവ് എക്സ്പ്രസ് ട്രെയിൻ ഷൊർണ്ണൂരിൽ നിന്ന് പുറപ്പെടുന്ന സമയം 7.20 ആയിരുന്നു. നിലവിലുള്ള സാഹചര്യത്തിൽ കോയമ്പത്തൂരിൽ നിന്ന് വരുന്ന ട്രെയിനിലെ യാത്രക്കാരായ സ്ത്രീകളും കുട്ടികളും ഉൾപ്പെടെയുള്ള യാത്രക്കാർ‌ ഇപ്പോൾ‌ ട്രാക്കുകളിലൂടെ തന്നെ നടന്ന്‌വന്ന് എക്സിക്യുട്ടീവ് ട്രെയിനിൽ കയറുകയാണ് ചെയ്യുന്നത്. രണ്ട് ട്രെയിനുകളും ഒരേ സമയത്ത് വരുന്നത് കൊണ്ട് പലപ്പോഴും യാത്രക്കാർ ട്രാക്കിലൂടെ ഓടി കയറുന്ന സാഹചര്യവുമാണ് നിലവിലുള്ളത്. എക്സിക്യൂട്ടീവ് ട്രെയിനിൽ കയറാൻ പറ്റിയില്ലെങ്കിൽ അടുത്ത ട്രെയിൻ എത്തിച്ചേരാൻ അർ‌ദ്ധരാത്രി വരെ ദീർഘനേരം കാത്തിരിക്കേണ്ടിവരുമെന്ന ദുര്യോഗവും ജനങ്ങൾ സഹിക്കണം.

യാത്രക്കാർ‌ക്ക് ധൃതിയിൽ ട്രെയിനിൽ കയറുമ്പോൾ ഉണ്ടാകുന്ന അപകടവും മറ്റ് ബുദ്ധിമുട്ടുകളും പരിഗണിച്ച് ആലപ്പുഴ -കണ്ണൂർ എക്സിക്യുട്ടീവ് എക്സ്പ്രസ്സിന്റെ ഷോർണ്ണൂർ ജംഗ്ഷനിലെ പുറപ്പെടൽ സമയം വൈകിട്ട് 7.20ന് തന്നെ ക്രമീകരിക്കുന്നതിനുള്ള നടപടി സ്വീകരിക്കണമെന്ന് കേന്ദ്രമന്ത്രി പിയൂഷ് ഗോയലിനോട് നിവേദനത്തിലൂടെ ആവശ്യപ്പെട്ടു.