ഐഎൻഎക്സ് മീഡിയ കേസ്; മുൻ കേന്ദ്രമന്ത്രി പി ചിദംബരം അറസ്റ്റിൽ
ന്യൂഡല്ഹി : ഐഎന്എക്സ് മീഡിയ കേസില് മുന് കേന്ദ്രമന്ത്രിയും കോൺഗ്രസ് നേതാവുമായ പി ചിദംബരത്തെ സിബിഐ അറസ്റ്റ് ചെയ്തു. എഐസിസി ആസ്ഥാനത്ത് നടത്തിയ വാര്ത്താ സമ്മേളനത്തിനു ശേഷം വീട്ടിലെത്തിയ ചിദംബരത്തെ അവിടെയെത്തിയാണ് സിബിഐ അറസ്റ്റ് ചെയ്തത്. ചിദംബരത്തിന്റെ മുന്കൂര് ജാമ്യാപേക്ഷ വെള്ളിയാഴ്ച സുപ്രീം കോടതി പരിഗണിക്കാനിരിക്കെയാണ് സിബിഐയുടെ നടപടി.
പത്രസമ്മേളനത്തിനു ശേഷം രാത്രി 8.30 ഓടെയാണ് ചിദംബരവും അഭിഭാഷകനായ കപില് സിബലും ചിദംബരത്തിന്റെ വീട്ടിലെത്തിയത്. പിന്നാലെ എത്തിയ സിബിഐ ഉദ്യോഗസ്ഥർ ഗേറ്റ് പൂട്ടിക്കിടക്കുകയായിരുന്നതിനാല് മതില് ചാടിക്കടന്നാണ് വീട്ടിലെത്തിയത്. നാടകീയ നിമിഷങ്ങള്ക്കൊടുവിലാണ് അറസ്റ്റുണ്ടാവുന്നത്.
അന്വേഷണ ഏജന്സിയായ സിബിഐ നിയമത്തെ ബഹുമാനിക്കുന്നുണ്ടെങ്കില് അറസ്റ്റ് ഉള്പ്പെടെയുള്ള നടപടി സ്വീകരിക്കുന്നതിന് വെള്ളിയാഴ്ച വരെ കാത്തിരിക്കണമെന്നും ചിദംബരം ആവശ്യപ്പെട്ടിരുന്നു. വെള്ളിയാഴ്ചയും അതിനു ശേഷവും തനിക്ക് നീതി ലഭിക്കുമെന്നാണ് വിശ്വസിക്കുന്നതെന്നും ചിദംബരം പറഞ്ഞിരുന്നു.