ചിദംബരത്തിനെതിരെ ലുക്ക് ഔട്ട് നോട്ടീസ്
ന്യൂഡല്ഹി: ഐഎന്എക്സ് മീഡിയ അഴിമതിക്കേസില് മുന് കേന്ദ്രമന്ത്രി പി. ചിദംബരത്തിനെതിരെ സിബിഐ ലുക്ക് ഔട്ട് നോട്ടീസ് അയച്ചു. ചോദ്യം ചെയ്യാന് ഹാജരാകാതിരുന്നതിനെ തുടര്ന്നാണ് ലുക്ക് ഔട്ട് നോട്ടീസ് പുറപ്പെടുവിച്ചത്. രണ്ടു മണിക്കൂറിനുള്ളില് ഹാജരാകണമെന്ന് ചൂണ്ടിക്കാട്ടി ഇന്നലെ അര്ധരാത്രി ചിദംബരത്തിന്റെ വസതിയില് സിബിഐ നോട്ടീസ് പതിച്ചിരുന്നു.
ഡല്ഹി ഹൈക്കോടതി മുന്കൂര്ജാമ്യാപേക്ഷ തള്ളിയതിനെ തുടര്ന്ന് ഇന്നലെ അര്ധരാത്രിയടക്കം മൂന്നുതവണ ചിദംബരത്തിന്റെ വസതിയില് സിബിഐ സംഘമെത്തിയിരുന്നു. ചിദംബരം വീട്ടില് ഇല്ലാതിരുന്നതിനെ തുടര്ന്ന് സിബിഐ അറസ്റ്റ് ചെയ്യാനാവാതെ മടങ്ങുകയും ചെയ്തു. രാത്രി സിബിഐ മടങ്ങിയതിനു പിന്നാലെ എന്ഫോഴ്സ്മെന്റ് ഡയറക്ടറേറ്റ് (ഇഡി) സംഘവും ചിദംബരത്തിന്റെ വീട്ടില് എത്തി. ചിദംബരത്തെ ചോദ്യം ചെയ്യാന് കസ്റ്റഡിയിലെടുക്കേണ്ടത് ആവശ്യമാണെന്ന സിബിഐയുടേയും ഇഡിയുടേയും വാദം അംഗീകരിച്ചാണ് ഹൈക്കോടതി ജാമ്യാപേക്ഷ തള്ളിയത്.