അന്താരാഷ്ട്ര ചലച്ചിത്രമേളയ്ക്കും ഭീഷണിയായി കൊറോണ: രജിസ്റ്റര് ചെയ്ത 20 പേര്ക്ക് രോഗബാധ
തിരുവനന്തപുരം: അന്താരാഷ്ട്ര ചലചിത്ര മേളയ്ക്ക് രജിസ്റ്റര് ചെയ്ത 20 പേര്ക്ക് കൊറോണ സ്ഥിരീകരിച്ചു. ചലച്ചിത്ര മേള ബുധനാഴ്ച തിരുവനന്തപുരത്ത് തുടങ്ങാനിരിക്കെ ടാഗോര് തീയേറ്റര് ഹാളില് നടത്തിയ പരിശോധനയിലാണ് ഡെലിഗേറ്റ്സുകള്ക്ക് രോഗം സ്ഥിരീകരിക്കുന്നത്. 1500 പേരെ പരിശോധിച്ചതില് 20 പേരുടെ പരിശോധനാ ഫലം പോസിറ്റീവ് ആവുകയായിരുന്നു.
20 പേര്ക്ക് രോഗം സ്ഥിരീകരിച്ചതോടെ ചലച്ചിത്ര മേളയ്ക്കും കൊറോണ ഭീഷണിയാകുകയാണ്. നാളെ കൂടി ചലച്ചിത്ര അക്കാദമിയുടെ നേതൃത്വത്തില് ഡെലിഗേറ്റുകള്ക്ക് കൊറോണ പരിശോധനയ്ക്ക് അവസരം ഉണ്ടാകും. അതിനുശേഷം എത്തുന്നവര്ക്ക് സ്വന്തം നിലയില് പരിശോധന നടത്തേണ്ടിവരും.
കൊറോണ മാനദണ്ഡങ്ങള് പാലിച്ച് നാല് നഗരങ്ങളിലായി പല ഘട്ടങ്ങളായാണ് ഇക്കുറി ചലച്ചിത്ര മേള നടക്കുന്നത്. 2500 പേര്ക്കാണ് ആകെ പ്രവേശനം അനുവദിക്കുക. വിവിധ തീയേറ്ററുകളിലായി 2116 സീറ്റുകള് സജ്ജീകരിച്ചിട്ടുണ്ട്. തീയേറ്ററുകളില് പകുതി സീറ്റുകളില് മാത്രമായിരിക്കും പ്രവേശനം.