ഭൂകമ്പത്തിൽ മഹാരാഷ്ട്രയിലെ പൽഘർ ജില്ലയിൽ വീട് തകർന്നുവീണു സ്ത്രീ മരിച്ചു

Ajith.A

25 July 2019 12:19 PM

പൽഘർ: മഹാരാഷ്ട്രയിലെ പൽഘർ ജില്ലയിൽ ഭൂകമ്പത്തിൽ വീട് തകർന്നുവീണു സ്ത്രീ മരിച്ചു. വ്യാഴാഴ്ച പുലർച്ചെയാണ് വീട് തകർന്നതിനെ തുടർന്ന് ഒരു സ്ത്രീ കൊല്ലപ്പെട്ടത്. പുലർച്ചെ 1.03 ന് 3.8 തീവ്രത രേഖപ്പെടുത്തിയതും പുലർച്ചെ 1.15 ന് 3.6 തീവ്രത രേഖപ്പെടുത്തിയതുമായ ഭൂചലനങ്ങളാണ് ദഹാനു, തൽസാരി താലൂക്കുകളിൽ അനുഭവപ്പെട്ടത്. പുലർച്ചെ 1.03 നും 1.15 നും ഇടയിൽ ദഹാനു, തൽസാരി, ബോയിസർ പ്രദേശങ്ങളിൽ 2.9, 2.8 തീവ്രത രേഖപ്പെടുത്തിയ രണ്ട് ഭൂചലനങ്ങൾ അനുഭവപ്പെട്ടു.നേരിയ ഭൂചലനത്തെത്തുടർന്ന് ദഹാനുവിലെ വാസവ്‌ലപാഡ പ്രദേശത്ത് വീട് തകർന്നാണ് റിഷ്മ മേഘ്‌വാലെ (55) എന്ന സ്ത്രീ കൊല്ലപ്പെട്ടതെന്ന് താനെ ജില്ലയിലെ പ്രാദേശിക ദുരന്ത നിവാരണ സെൽ‌മേധാവി പറഞ്ഞു.

ജില്ലയിൽ ഇത്തരം അപകടങ്ങൾ ആവർത്തിക്കുന്നതിൽ പരിഭ്രാന്തരായ ജീവനക്കാർ ആശങ്ക പ്രകടിപ്പിച്ചതായി പൽഘർ ദുരന്ത നിവാരണ സെൽ മേധാവി പറഞ്ഞു. ബുധനാഴ്ച മുതൽ ഏഴ് നേരിയ ഭൂചലനങ്ങൾ അനുഭവപ്പെട്ടു. ദുണ്ടൽവാടി ഗ്രാമത്തിൽ 10 കിലോമീറ്റർ താഴ്ചയിലാണ് ഭൂചലനത്തിന്റെ പ്രഭവകേന്ദ്രങ്ങൾ രേഖപ്പെടുത്തിയിരിക്കുന്നത്.

സ്ഥിതിഗതികൾ അവലോകനം ചെയ്യുകയാണെന്ന് പൽഘർ കളക്ടർ കൈലാസ് ഷിൻഡെ പറഞ്ഞു. ദുരിതബാധിത ഗ്രാമങ്ങൾ സന്ദർശിച്ച് നാശനഷ്ടങ്ങൾ പരിശോധിക്കാൻ പ്രാദേശിക റവന്യൂ ഉദ്യോഗസ്ഥർക്ക് നിർദേശം നൽകി.