മന്ത്രി കെ ടി ജലീലിനെ ചോദ്യം ചെയ്യാന് കസ്റ്റംസും
ഉന്നത വിദ്യാഭ്യാസ വകുപ്പ് മന്ത്രി കെ ടി ജലീലിനെ കസ്റ്റംസ് ചോദ്യം ചെയ്യും. നയതന്ത്ര പാഴ്സല് വഴി മതഗ്രന്ഥങ്ങള് കൊണ്ടുവന്നതുമായി ബന്ധപ്പെട്ടാണ് ചോദ്യം ചെയ്യല്. മന്ത്രിക്ക് കസ്റ്റംസ് ഉടന് നോട്ടിസ് നല്കുമെന്നാണ് വിവരം. കഴിഞ്ഞ ദിവസം എന്ഫോഴ്സ്മെന്റ് ഡയറക്ടറേറ്റ് മന്ത്രിയെ ചോദ്യം ചെയ്തിരുന്നു. എന്നാല് ഏജന്സിയുടെ ചോദ്യങ്ങള്ക്ക് കൃത്യമായ ഉത്തരമല്ല മന്ത്രി നല്കിയതെന്നാണ് വിവരം.
അതേസമയം പ്രതിപക്ഷ സംഘടനകള് മന്ത്രിയുടെ രാജിക്കായി നടത്തുന്ന പ്രതിഷേധങ്ങള് തുടരുകയാണ്. ഇന്നലെ രാത്രി വൈകിയും പ്രതിഷേധമുണ്ടായി. സെക്രട്ടേറിയറ്റിന് മുന്നില് നടത്ത പ്രതിഷേധം സംഘര്ഷത്തിലാണ് കലാശിച്ചത്. ധാര്മികതയുണ്ടെങ്കില് കെ ടി ജലീല് രാജി വയ്ക്കണമെന്ന് പ്രതിപക്ഷ നേതാവ് രമേശ് ചെന്നിത്തല പറഞ്ഞു. മന്ത്രി രാജി വയ്ക്കും വരെ പ്രതിഷേധിക്കുമെന്ന് പ്രഖ്യാപിച്ച ബിജെപി ഇന്ന് സംസ്ഥാനത്ത് കരിദിനം ആചരിക്കുന്നുണ്ട്.
സ്വര്ണക്കടത്ത് കേസില് കെ ടി ജലീലിനെയും ബിനീഷ് കോടിയേരിയെയും എന്ഫോഴ്സ്മെന്റ് ഡയറക്ടറേറ്റ് ചോദ്യം ചെയ്തിരുന്നു. ഇരുവരില് നിന്നും പ്രാഥമിക വിവരങ്ങള് മാത്രമാണ് എന്ഫോഴ്സ്മെന്റ് ഡയറക്ടറേറ്റ് തേടിയിട്ടുള്ളത്. മന്ത്രി ജലീലിനേയും, ബിനീഷിനേയും വീണ്ടും ചോദ്യം ചെയ്യാന് അന്വേഷണസംഘം വിളിപ്പിക്കും.
മതഗ്രന്ഥങ്ങള് എടപ്പാളിലേയ്ക്ക് കൊണ്ടുപോകുന്നതിനിടെ സിഡാക്കിന്റെ വാഹനത്തിലെ ജിപിഎസ് അപ്രത്യക്ഷമായതില് ദുരൂഹത നിലനില്ക്കുന്നതായി എന്ഫോഴ്സ്മെന്റ് ഡയറക്ടറേറ്റ് സംശയിക്കുന്നു. ഇക്കാര്യത്തില് മന്ത്രിക്ക് കൃത്യമായ മറുപടി നല്കാന് കഴിഞ്ഞിട്ടില്ല. ഇതില് വ്യക്തത വരുത്തിയ ശേഷമാവും ജലീലിനെ വീണ്ടും ചോദ്യം ചെയ്യുക.