ഇത്തവണ തെരഞ്ഞെടുപ്പില് മത്സരിക്കും; മുഖ്യമന്ത്രിയാകാന് പ്രയത്നിക്കും- കമല്ഹാസന്
ചെന്നൈ: വരാനിരിക്കുന്ന തമിഴ്നാട് നിയമസഭാ തെരഞ്ഞെടുപ്പില് തീര്ച്ചയായും മത്സരിക്കുമെന്ന് വ്യക്തമാക്കി നടനും മക്കള് നീതി മയ്യം നേതാവുമായ കമല്ഹാസന്. എവിടെ മത്സരിക്കുമെന്ന കാര്യത്തില് ഇതുവരെ തീരുമാനമായിട്ടില്ലെന്നും അദ്ദേഹം പറഞ്ഞു.
'തീര്ച്ചയായും. ഞാന് ഈ തെരഞ്ഞെടുപ്പില് മത്സരിക്കുന്നുണ്ട്. എവിടെ മത്സരിക്കുമെന്ന് ഇതുവരെ തീരുമാനിച്ചിട്ടില്ല. സഖ്യകക്ഷികളുമായി ബന്ധപ്പെട്ട കാര്യങ്ങളില് തീരുമാനമാകുമ്ബോള് പ്രഖ്യാപനമുണ്ടാകും,' കമല് ഹാസന് പറഞ്ഞു.
രജനീകാന്ത് രാഷ്ട്രീയത്തിലേക്ക് വരില്ലെന്നും കമല്ഹാസന് പറഞ്ഞു. ഒരു സുഹൃത്തെന്ന നിലയിലാണ് താന് പിന്തുണ തേടിയതെന്നും കമല് സ്വകാര്യ ചാനലിനോട് പറഞ്ഞു. കേരളത്തില് പിണറായി വിജയന് വീണ്ടും മുഖ്യമന്ത്രിയാകണമെന്നാണ് തന്റെ ആഗ്രഹമെന്നും കമല് കൂട്ടിച്ചേര്ത്തു.
ചെന്നൈയില് മൈലാപൂര്, വേളാച്ചേരി എന്നീ മണ്ഡലങ്ങളാണ് കമലിന് വേണ്ടി പരിഗണിക്കുന്നതെന്നാണ് സൂചനകള്. മധുരയിലോ കോയമ്ബത്തൂരിലോ മത്സരിക്കുമെന്നും സൂചനയുണ്ട്.