ടൈറ്റാനിയം അന്വേഷണം സിബിഐ ഏറ്റെടുക്കാന്‍ വൈകുന്നതെന്ത്; കേന്ദ്രം വിശദീകരണം നല്‍കണം: ഹൈക്കോടതി
മുന്‍ മുഖ്യമന്ത്രി ഉമ്മന്‍ ചാണ്ടി, മുന്‍ മന്ത്രിമാരായ രമേശ് ചെന്നിത്തല ഇബ്രാഹിം കുഞ്ഞ് എന്നിവരടക്കമുള്ളവര്‍ക്കെതിരെ ആരോപണം ഉയര്‍ന്ന ടൈറ്റാനിയം അഴിമതി കേസിന്റെ അന്വേഷണം സിബിഐ ഏറ്റെടുക്കാന്‍ വൈകുന്നതിനെതിരെ കേന്ദ്ര സര്‍ക്കാരും സിബിഐയും വിശദികരണം നല്‍കണമെന്ന് ഹൈക്കോടതി. സര്‍ക്കാര്‍ ഖജനാവിന് 120 കോടിയോളം രൂപയുടെ നഷ്ടമുണ്ടായ ടൈറ്റാനിയം അഴിമതി കേസില്‍ 2019 സെപ്തംബറില്‍ സിബിഐ അന്വേഷണത്തിന് സംസ്ഥാന സര്‍ക്കാര്‍ ശുപാര്‍ശ ചെയ്തിട്ടും കേസ് രജിസ്റ്റര്‍ ചെയ്ത് അന്വേഷിക്കാന്‍ നടപടിയില്ലെന്ന് ചൂണ്ടിക്കാട്ടി ടൈറ്റാനിയം കമ്പനി ജീവനക്കാരനായിരുന്ന എസ്.ജയന്‍ സമര്‍പ്പിച്ച ഹര്‍ജിയിലാണ് ജസ്റ്റീസ് വി.ജി.അരുണിന്റെ നടപടി.
സംസ്ഥാന സര്‍ക്കാരിന്റെ വിജ്ഞാപനത്തിനു പിന്നാലെ വിജിലന്‍സ്, കേസിന്റെ മുഴുവന്‍ രേഖകളും കഴിഞ്ഞ ഡിസംബറില്‍ തന്നെ കൈമാറിയെങ്കിലും സിബിഐ ഒരു നടപടിയും കൈക്കൊണ്ടില്ലെന്ന് ഹര്‍ജിയില്‍ പറയുന്നു. മലിനീകരണ നിയന്ത്രണ സംവിധാനങ്ങള്‍ ഏര്‍പ്പെടുത്തുന്നതിന് വിദേശത്തു നിന്ന് സാമഗ്രികള്‍ ഇറക്കുമതി ചെയ്തങ്കിലും സ്ഥാപിക്കാന്‍ കഴിയാത്തതിനെ തുടര്‍ന്ന് സര്‍ക്കാര്‍ ഖജനാവിന് നഷ്ടം വരുത്തിയതിനു പിന്നില്‍ അഴിമതി നടന്നുവെന്നാണ് ആരോപണം. കമ്പനിയുടെ മേല്‍ ഉദ്യോഗസ്ഥരെ കൂടാതെ മുഖ്യമന്ത്രിയായിരുന്ന ഉമ്മന്‍ ചാണ്ടി, കെ.പി.സി.സി.പ്രസിഡന്റായിരുന്ന രമേശ് ചെന്നിത്തല വ്യവസായ വകുപ്പ് മന്ത്രിയായിരുന്ന ഇബ്രാഹിം കുഞ്ഞ് എന്നിവര്‍ക്കെതിരെയായിരുന്നു ആരോപണം. അഴിമതി നടന്നതായി വിജിലന്‍സ് കോടതിയില്‍ ബോധിപ്പിച്ചിരുന്നുവെന്ന് ഹര്‍ജിയില്‍ ചൂണ്ടിക്കാട്ടി.
ഫിന്‍ലന്‍ഡില്‍ നിന്നും ഇറക്കുമതി നടത്തിയതിന് ഇടനിലക്കാരനായ വ്യക്തിയെ ഇതുവരെ വിജിലന്‍സിന് ചോദ്യം ചെയ്യാന്‍ കഴിഞ്ഞിട്ടില്ലെന്നും വിദേശത്ത് കഴിയുന്ന ഇയാളെ സിബിഐ ചോദ്യം ചെയ്യണമെന്നും വിദേശ ബാങ്കുകള്‍ വഴി നടന്ന പണ ഇടപാടുകളെക്കുറിച്ച് അന്വേഷണം നടത്തേണ്ടത് സി ബി ഐയാണന്നും ഹര്‍ജിയില്‍ പറയുന്നു.
അന്വഷണം സിബിഐക്ക് കൈമാറാന്‍ ശുപാര്‍ശ ഉണ്ടായിട്ടും ഉത്തരവ് പുറപ്പെടുവിക്കാന്‍ കേന്ദ്ര സര്‍ക്കാര്‍ വീഴ്ച വരുത്തിയതായും ഹര്‍ജിയില്‍ പറയുന്നു.
Related News
പുതിയ സിബിഐ മേധാവി സുബോധ് കുമാര് ജയ്സ്വാള്
യു.ഡി.എഫ് കൊടുങ്കാറ്റുപോലെ തിരിച്ചുവരും: വി.ഡി സതീശന്
സത്യപ്രതിജ്ഞക്ക് പരമാവധി ആളെ കുറയ്ക്കണമെന്ന് ഹൈക്കോടതി
വാക്സിനുകൾ എന്തിനു വിദേശത്തേക്ക് കയറ്റി അയച്ചു ? ; മോദിയെ വിമര്ശിച്ച 15 പേര് അറസ്റ്റില്