വിജയ്. പി. നായരെ മര്ദ്ദിച്ച കേസ്: ഭാഗ്യലക്ഷ്മിയടക്കമുള്ളവര് ഹൈക്കോടതിയിലേക്ക്
കൊച്ചി: യുട്യൂബില് സ്ത്രീകളെ ലൈംഗികമായി അധിക്ഷേപിച്ച് വീഡിയോ പ്രചരിപ്പിച്ച വിജയ് പി. നായരെ മര്ദ്ദിച്ച കേസില് ഭാഗ്യലക്ഷ്മിയടക്കമുള്ളവര് ഹൈക്കോടതിയിലേക്ക്. ഇവര് നാളെ ഹൈക്കോടതിയില് മുന്കൂര് ജാമ്യാപേക്ഷ സമര്പ്പിക്കും. കീഴ് കോടതി ജാമ്യാപേക്ഷ തള്ളിയ സാഹചര്യത്തിലാണ് ഇവര് ഹൈക്കോടതിയിലേക്ക് നീങ്ങിന്നത്.
എന്നാല് കയ്യേറ്റം ചെയ്തതില് പ്രതികളുടെ അറസ്റ്റ് ഉടനില്ലെന്ന് ഇന്നലെ പോലീസ് അറിയിച്ചിരുന്നു. നടപടി തെളിവ് ശേഖരണം പൂര്ത്തിയാക്കിയ ശേഷം മതിയെന്നാണ് പൊലീസ് തലത്തില് തീരുമാനം . നിലവില് ഭാഗ്യലക്ഷ്മി അടക്കമുള്ളവര് പൊലീസിന്റെ നിരീക്ഷണത്തിലാണ്. വിജയ് പി നായരുടെ മുറിയില് നിന്നെടുത്ത ലാപ്ടോപ്പും മൊബൈലും പൊലീസിന് കൈമാറിയിരുന്നു. പ്രതികള്ക്കെതിരെ ചുമത്തിയ മോഷണകുറ്റം നിലനില്ക്കുമോയെന്നാണ് പൊലീസ് പരിശോധിക്കുന്നത്. അശ്ലീല യൂട്യൂബര് വിജയ് പി നായരെ ആക്രമിച്ചുവെന്ന കേസില് ചലച്ചിത്ര പ്രവര്ത്തക ഭാഗ്യലക്ഷ്മിയും ഒപ്പമുണ്ടായിരുന്ന ദിയ സനയും ശ്രീലക്ഷ്മി അറയ്ക്കലും ഒളിവിലായിരുന്നു എന്നാണ് നേരത്തെ പറഞ്ഞത്. എന്നാല് ജാമ്യം തേടി ഹൈക്കോടതിയെ സമീപിക്കുന്നതിന് സാവകാശം നല്കാനാണ് മെല്ലപ്പോക്ക്.