ദുബായില്‍ നിന്നും 180 യാത്രക്കാരുമായുള്ള ആദ്യ വിമാനം ഇന്ന് കണ്ണൂരിലെത്തും

News Desk

12 May 2020 02:13 PM

കണ്ണൂ‍ര്‍: കൊവിഡ് വ്യാപന പശ്ചാത്തലത്തില്‍ നാട്ടിലേക്ക് മടങ്ങുന്ന പ്രവാസികളുമായി കണ്ണൂരില്‍ ആദ്യ വിമാനം ഇന്നിറങ്ങും. ദുബായില്‍ നിന്നും വരുന്ന എയര്‍ ഇന്ത്യ എക്സ്പ്രസിന്‍റെ ബോയിങ്ങ് 737 വിമാനത്തില്‍ 180 യാത്രക്കാരുണ്ടാകും . വൈകിട്ട് 7.10ന് ദുബായില്‍ നിന്നുംവിമാനം പുറപ്പെടും . തിരിച്ചെത്തുന്ന യാത്രക്കാരുടെ പരിശോധനയ്ക്കടക്കം എല്ലാ ഒരുക്കങ്ങളും പൂര്‍ത്തിയായതായി ജില്ലാ ഭരണകൂടം അറിയിച്ചു.

180 യാത്രക്കാരില്‍ 109 പേര്‍ കണ്ണൂര്‍ സ്വദേശികളും 47 പേര്‍ കാസര്‍കോട് ജില്ലക്കാരുമാണ്. ഇവരെ കൊണ്ടുവരാനായി കണ്ണൂര്‍ വിമാനത്താവളത്തില്‍ നിന്നും പത്തരക്ക് വിമാനം പുറപ്പെട്ടു. സമൂഹിക അകലം പാലിച്ച്‌ 20 പേര്‍ വീതമുള്ള സംഘമായാണ് വിമാനത്തില്‍ നിന്നും യാത്രക്കാരെ ഇറക്കുക. തുടര്‍ന്ന് റാപ്പിഡ് ടെസ്റ്റ്. ഇതിനായി അഞ്ച് മെഡിക്കല്‍ ഡെസ്ക്കുകള്‍ സജ്ജീകരിച്ചിട്ടുണ്ട് . രോഗലക്ഷണങ്ങളുള്ളവരെ പ്രത്യേക വഴിയിലൂടെ ആംബുലന്‍സില്‍ ആശുപത്രികളിലേക്ക് മാറ്റും. മറ്റ് യാത്രക്കാര്‍ ഓരോ ജില്ലക്കുമായി ഒരുക്കിയ പ്രത്യേകം ഇരിപ്പിടങ്ങളിലേക്ക് പോകണം. യാത്രക്കാരുടെ ബാഗേജുകളും ഹാന്‍ഡ് ബാഗുകളും പൂര്‍ണമായും അണുവിമുക്തമാക്കും. ഓരോ ജില്ലകളിലേക്കും പോകേണ്ടവര്‍ക്കായി പുറത്ത് കെഎസ്‌ആര്‍ടിസി ബസുകളുണ്ടാകുഎന്നും അധികൃതര്‍ അറിയിച്ചു .