രാഹുല് ഗാന്ധി നാളെ കേരളത്തിലെത്തും
കോഴിക്കോട്: വയനാട്ടില് സ്കൂള് കെട്ടിടത്തിന്റെ ഉദ്ഘാടനത്തിന് അനുമതി നിഷേധിച്ച വിവാദങ്ങള്ക്കിടെ രാഹുല് ഗാന്ധി എം.പി തിങ്കളാഴ്ച കേരളത്തിലെത്തും. മൂന്ന് ദിവസത്തേക്കാണ് സന്ദര്ശനം. ബുധനാഴ്ച വൈകീട്ട് ഡല്ഹിയിലേക്ക് തിരിക്കും.
തിങ്കളാഴ്ച രാവിലെ 11.30ന് കോഴിക്കോട് വിമാനത്താവളത്തിലെത്തുന്ന രാഹുല് ഗാന്ധി ഉച്ചക്ക് 12.30ന് കോവിഡ് പ്രതിരോധ പ്രവര്ത്തനങ്ങളുമായി ബന്ധപ്പെട്ട യോഗത്തില് പങ്കെടുക്കും. ഉച്ചക്ക് 2 മണിക്ക് വയനാട്ടില് എത്തും.
ചൊവ്വാഴ്ച 10.30ന് വയനാട് കലക്ട്രേറ്റില് നടക്കുന്ന മീറ്റിങ്ങിലും 11.30ന് ദിശയുടെ മീറ്റിങ്ങിലും പങ്കെടുക്കും. രാഷ്ട്രീയ വിഷയങ്ങള്ക്കും വിവാദങ്ങള്ക്കും ഇട നല്കാതെ വികസന പദ്ധതികള് സംബന്ധിച്ച ചര്ച്ചകളും കോവിഡ് പ്രതിരോധ പ്രവര്ത്തനങ്ങള് സംബന്ധിച്ച വിഷയങ്ങള്ക്കുമാണ് ഊന്നല് നല്കുക.
ഔദ്യോഗിക ചര്ച്ചകള് മാത്രമാണ് ഈ ദിവസങ്ങളില് നടക്കുക. ഇതിനിടയില് ഭാരത് മാതാ പദ്ധതിയുടെ അലൈയ്ന്മെന്റ് സംബന്ധിച്ച് രാഹുല് ഗാന്ധി കലക്ടറുമായി ചര്ച്ച നടത്തും. ബുധനാഴ്ച രണ്ട് മണിക്ക് മാനന്തവാടി ജില്ലാ ആശുപത്രി സന്ദര്ശിച്ച ശേഷമാണ് 3.20ന് ഡല്ഹിക്ക് മടങ്ങുക.