ഫൈസര് വാക്സിന്: അടുത്ത ബാച്ച് ഒരാഴ്ചക്കകം
കുവൈത്ത് സിറ്റി: കുവൈത്തില് അടുത്ത ബാച്ച് ഫൈസര്, ബയോണ്ടെക് വാക്സിന് അടുത്തയാഴ്ച എത്തും. ഫൈസര് കമ്ബനി ഉല്പാദനം താല്ക്കാലികമായി നിര്ത്തിവെച്ചത് കുവൈത്തിലെ കുത്തിവെപ്പ് ദൗത്യം മന്ദഗതിയിലാക്കിയിരുന്നു. ഇപ്പോള് അവര് ഉല്പാദനം പുനരാരംഭിച്ചിട്ടുണ്ട്. രാജ്യത്ത് ആദ്യമായി ഇറക്കുമതി ചെയ്ത കോവിഡ് വാക്സിന് ഫൈസര്, ബയോണ്ടെക് ആണ്.
ഫൈസര് വാക്സിന് മറ്റു വാക്സിനുകള്ക്ക് സമാനമായി ചെറിയ പാര്ശ്വഫലങ്ങള് ഉണ്ടാവുമെന്നും അത് അപകടകരമല്ലെന്നും ആരോഗ്യ വിദഗ്ധര് പറയുന്നുവെങ്കിലും ഇതുവരെ കുവൈത്തില് ആര്ക്കും വാക്സിന് പാര്ശ്വഫലം റിപ്പോര്ട്ട് ചെയ്തിട്ടില്ല. 10 ലക്ഷം ഡോസ് ഫൈസര്, 17 ലക്ഷം ഡോസ് മോഡേണ, 30 ലക്ഷം ഡോസ് ഒാക്സ്ഫഡ് ആസ്ട്രസെനിക്ക എന്നീ വാക്സിനുകളാണ് കുവൈത്ത് ഇറക്കുമതി ചെയ്യാന് ധാരണയായിട്ടുള്ളത്.
ആഗോള തലത്തിലെ വാക്സിന് ദൗര്ലഭ്യം ഏതാനും മാസങ്ങള്ക്കകം തീരുമെന്നാണ് കരുതുന്നത്. കൂടുതല് വാക്സിന് എത്തുകയും എല്ലാ കേന്ദ്രങ്ങളും പ്രവര്ത്തിക്കുകയും ചെയ്യുന്നതോടെ ഒരു ദിവസം 20,000 പേര്ക്ക് കുത്തിവെപ്പ് എടുക്കാം.