ന്യൂനമര്ദ്ദം ഉംപൂണ് ചുഴലിക്കാറ്റായി മാറി, 48 മണിക്കൂറിനുള്ളില് തീവ്രമാകും; മൂന്നു സംസ്ഥാനങ്ങളില് ജാഗ്രത, കേരളത്തില് കനത്ത മഴയ്ക്ക് സാധ്യത
ഹൈദരാബാദ്: ബംഗാള് ഉള്ക്കടലില് രൂപം കൊണ്ട അതിതീവ്ര ന്യൂനമര്ദ്ദം ഉംപൂണ് ചുഴലിക്കാറ്റായി മാറി. 48 മണിക്കൂറിനുള്ളില് ഈ ചുഴലിക്കാറ്റ് അതിതീവ്ര ചുഴലിക്കാറ്റായി മാറുമെന്ന് കാലാവസ്ഥാ നിരീക്ഷണ വകുപ്പ് മുന്നറിയിപ്പ് നല്കി. ചൊവ്വാഴ്ച രാത്രിയോടെ ഇത് ഇന്ത്യന് തീരത്തെത്തും. ഒഡിഷക്കും പശ്ചിമബംഗാളിനും ഇടയില് തീരം തൊടുമെന്നാണ് കരുതുന്നത്. അതിതീവ്ര ചുഴലിക്കാറ്റായി മാറിയാല് ഇതിന്റെ വേഗത 200 കിലോമീറ്ററായിരിക്കും. ചുഴലിക്കാറ്റിന്റെ പശ്ചാത്തലത്തില് ആന്ധ്ര പ്രദേശ്, ഒഡിഷ, പശ്ചിമ ബംഗാള് സംസ്ഥാനങ്ങളില് അതീവ ജാഗ്രത നിര്ദ്ദേശം പുറപ്പെടുവിച്ചിട്ടുണ്ട്.
കേരളത്തിലും കനത്ത മഴക്ക് സാദ്ധ്യതയുണ്ട്. നിലവില് ചെന്നൈ തീരത്തിന് 700 കിലോമീറ്റര് അകലെയാണ് ചുഴലിക്കാറ്റിന്റെ സഞ്ചാരപഥം. സംസ്ഥാനത്ത് ചിലയിടങ്ങളില് ശക്തമായ മഴക്ക് സാദ്ധ്യതയുണ്ട്. അഞ്ച് ജില്ലകളില് ഇന്ന് യെല്ലോ അലര്ട്ട് പ്രഖ്യാപിച്ചു. കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി എന്നീ ജില്ലകളിലാണ് ഇന്ന് യെല്ലോ അലര്ട്ട് പ്രഖ്യാപിച്ചിരിക്കുന്നത്. ഈ ജില്ലകള്ക്ക് പുറമേ തൃശൂര്, പാലക്കാട് ജില്ലകളില് നാളെ യെല്ലോ അലര്ട്ട് ആയിരിക്കും. അതേസമയം, കേരള തീരങ്ങളില് മത്സ്യത്തൊഴിലാളികള് ഒരു കാരണവശാലും കടലില് പോകാന് പാടുള്ളതല്ലെന്ന് നിര്ദ്ദേശമുണ്ട്.
വേനല്മഴയോടനുബന്ധിച്ചുള്ള ഇടിമിന്നലോട് കൂടിയ മഴ സംസ്ഥാനത്ത് വിവിധയിടങ്ങളില് അടുത്ത ദിവസങ്ങളിലും തുടരാന് സാദ്ധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.