എം. ശിവശങ്കറിനെ തിങ്കളാഴ്ച വീണ്ടും ചോദ്യം ചെയ്യും; ഇന്നലെ വിട്ടയച്ചത് എന്‍ഐഎ നോട്ടീസ് നല്‍കിയ ശേഷം
കൊച്ചി: സ്വര്‍ണക്കടത്ത് കേസില്‍ മുഖ്യമന്ത്രിയുടെ മുന്‍ പ്രിന്‍സിപ്പില്‍ സെക്രട്ടറി എം. ശിവശങ്കറിനെ തിങ്കളാഴ്ച വീണ്ടും ചോദ്യം ചെയ്യും. കൊച്ചിയിലെ എന്‍.ഐ.എ ഓഫീസില്‍ ഹാജരാകാന്‍ നോട്ടീസ് നല്‍കിയാണ് ഇന്നലെ വിട്ടയച്ചത്.ശിവശങ്കറിനെ ഇന്നലെ എന്‍.ഐ.എ അഞ്ചു മണിക്കൂറിലധികം ചോദ്യം ചെയ്തിരുന്നു.പേരൂര്‍ക്കടയില്‍ എന്‍.ഐ.എയുടെ ക്യാമ്പ് ഓഫീസ് ആയ പൊലീസ് ക്ലബ്ബിലേക്ക് ശിവശങ്കറിനെ വിളിച്ചുവരുത്തിയായിരുന്നു ചോദ്യം ചെയ്യല്‍.
വൈകിട്ട് നാലിനു തുടങ്ങിയ ചോദ്യം ചെയ്യല്‍ രാത്രി 8.55 നാണ് അവസാനിച്ചത്. ഇതിനിടെ സെക്രട്ടറിയേറ്റിലെ സിസിടിവി ദൃശ്യങ്ങള്‍ എന്‍ഐഎ പിടിച്ചെടുത്തതായാണ് സൂചന, സിസിടിവി ഇടിമിന്നലില്‍ കേടു വന്നെന്ന ന്യായം ഹൌസ് കീപ്പിംഗ് അഡീഷണല്‍ സെക്രട്ടറി വെറുതെ പറഞ്ഞതാണെന്നും തെളിഞ്ഞിരുന്നു. അതേസമയം, സ്വര്‍ണക്കടത്ത് കേസിന്റെ അന്വേഷണം സെക്രട്ടേറിയറ്റിലേക്ക് ദേശീയ അന്വേഷണ ഏജന്‍സി വ്യാപിപ്പിച്ചതോടെ സര്‍ക്കാര്‍ കൂടുതല്‍ പ്രതിസന്ധിയിലായിരിക്കുകയാണ്.