ബിജെപി അധികാരത്തില്‍ വന്നാല്‍ മുഖ്യമന്ത്രിയാകാന്‍ തയ്യാറെന്ന് ഇ.ശ്രീധരന്‍
കൊച്ചി: കേരളത്തില്‍ ബിജെപി അധികാരത്തില്‍ വന്നാല്‍ മുഖ്യമന്ത്രിയാകാന്‍ താന്‍ തയ്യാറെന്ന് മെട്രോമാന്‍ ഇ.ശ്രീധരന്‍. കഴിഞ്ഞ ദിവസം ബിജെപി സംസ്ഥാന പ്രസിഡന്റ് കെ.സുരേന്ദ്രനാണ് ഇ.ശ്രീധരന്‍ ബിജെപിയില്‍ ചേരുന്ന കാര്യം അറിയിച്ചത്. വിജയ് യാത്ര വേളയില്‍ അദ്ദേഹം ഔപചാരികമായി പാര്‍ട്ടി അംഗത്വമെടുക്കുമെന്ന് ബിജെപി സംസ്ഥാന അധ്യക്ഷന്‍ കെ.സുരേന്ദ്രന്‍ പറഞ്ഞിരുന്നു.
കേരളത്തിന്‌ നീതി ഉറപ്പാക്കാന്‍ ബിജെപി വന്നാലേ കഴിയൂവെന്ന് ഇ ശ്രീധരന്‍ പ്രതികരിച്ചിരുന്നു. സംസ്ഥാനത്തെ ഒമ്ബത് വര്‍ഷത്തെ അനുഭവത്തിന്റെ വെളിച്ചത്തിലാണ് ബിജെപി അംഗത്വമെടുക്കുന്നതിന് തീരുമാനിച്ചത്. പാര്‍ട്ടി പറഞ്ഞാല്‍ മത്സരിക്കാന്‍ താന്‍ തയ്യാറാണെന്നും അദ്ദേഹം വ്യക്തമാക്കിയിരുന്നു.
"ഇപ്പോള്‍ ഭരിക്കുന്ന പാര്‍ട്ടികള്‍ക്കൊന്നും കേരളത്തെ നേരെയാക്കാന്‍ പറ്റില്ല. ബിജെപി ജയിച്ചാല്‍ കേരളത്തിനു അനുകൂലമായ കാര്യങ്ങള്‍ ചെയ്യാന്‍ സാധിക്കും. പ്രത്യേകിച്ച്‌ തൊഴില്‍ നല്‍കുന്ന കാര്യത്തില്‍. ബിജെപി ആവശ്യപ്പെട്ടാല്‍ തിരഞ്ഞെടുപ്പില്‍ മത്സരിക്കും. ഏത് മണ്ഡലമാണെന്ന് ബിജെപി തീരുമാനിക്കും," ശ്രീധരന്‍ പറഞ്ഞു.
ദേശീയ നേതൃത്വം ഇടപെട്ടാണ് ശ്രീധരനെ പാര്‍ട്ടിയില്‍ എത്തിച്ചതെന്നാണ് സൂചന. ശ്രീധരന്‍ തിരഞ്ഞെടുപ്പില്‍ മത്സരിക്കണമെന്ന് സംസ്ഥാന നേതൃത്വം ദേശീയ നേതൃത്വത്തോട് ആവശ്യപ്പെട്ടിട്ടുണ്ട്.
നേരത്തെ ലോക്സഭാ തിരഞ്ഞെടുപ്പ് വേളയിലും ഇ.ശ്രീധരന്‍ ബിജെപിയിലേക്ക് എന്ന നിലയില്‍ പ്രചാരണമുണ്ടായിരുന്നു. ബിജെപി നേതാക്കള്‍ അദ്ദേഹവുമായി ചര്‍ച്ചയും നടത്തിയിരുന്നു. എന്നാല്‍ ആ സമയത്ത് അദ്ദേഹം ബിജെപി പ്രവേശനമെന്നതിനോട് പ്രതികരിക്കാന്‍ തയ്യാറായിരുന്നില്ല.
Related News
പെട്രോൾ വില വർദ്ധനവിനെക്കുറിച്ച് കെ.സുരേന്ദ്രന്റെ പ്രതികരണം
കൊടകര കുഴൽപ്പണ കവർച്ചാകേസിൽ കണ്ണൂരില് നിന്ന് ഏഴര ലക്ഷം രൂപ കൂടി കണ്ടെടുത്തു
‘നല്ല കാര്യങ്ങൾ ആര് ചെയ്താലും അംഗീകരിക്കും’; കേരളീയത്തിൽ പങ്കെടുത്ത് ബിജെപി നേതാവ് ഒ.രാജഗോപാൽ
കെ സുരേന്ദ്രനെതിരെ കേസെടുത്തു
