കൊറോണ; ചൈനയില്‍ മരണം 100 കടന്നു, 4000ത്തിലധികംപേർക്ക് രോഗ ബാധ; വൈറസ് ശ്രീലങ്കയിലും

News Desk

28 January 2020 10:11 AM

ബെയ്ജിങ്: കൊറോണ വൈറസിനെ പ്രതിരോധിക്കാനുള്ള അതിതീവ്ര ശ്രമങ്ങള്‍ക്കിടെ ചൈനയില്‍ വൈറസ് ബാധിച്ചു മരിച്ചവരുടെ എണ്ണം 106 ആയി. രോഗം സ്ഥിരീകരിച്ചവരുടെ എണ്ണം 4000 കടന്നു. 4193-പേരില്‍ രോഗം സ്ഥിരീകരിച്ചതായി ചൈനീസ് ദേശീയ ആരോഗ്യ കമ്മിഷന്‍ ചൊവ്വാഴ്ച രാവിലെ അറിയിച്ചു. തിങ്കളാഴ്ച മാത്രം 1300 പേരിലാണ് രോഗ ബാധ സ്ഥിരീകരിച്ചത്. തലസ്ഥാനമായ ബീജിങിലും ആദ്യമായി രോഗം കണ്ടെത്തി.

രോഗം ആദ്യം റിപ്പോർട്ട് ചെയ്ത ഹുബൈയിലുള്ളവരാണ് മരിച്ചവരിൽ കൂടുതലും. 32,799 പേര്‍ നിരീക്ഷണത്തിലാണ്. ഇതിനിടെ ജർമ്മനിയിലും ശ്രീലങ്കയിലും രോഗം സ്ഥിരീകരിച്ചതായുള്ള റിപ്പോർട്ടുകൾ ഇന്ത്യ ഉൾപ്പെടെ അയൽ രാജ്യങ്ങളിലും ആശങ്കക്ക് കാരണമാകും. കേരളത്തിൽ 436 നിരീക്ഷണത്തിൽ ഉണ്ടെകിലും ആർക്കും ഇതുവരെ രോഗം സ്ഥിരീകരിച്ചിട്ടില്ല.