ചന്ദ്രയാന് 2 ചന്ദ്രന്റെ ഭ്രമണപഥത്തില്
ബംഗളൂരു: ചന്ദ്ര പര്യവേക്ഷണത്തിന്റെ മറ്റൊരു നിര്ണായക ഘട്ടം കൂടി ചന്ദ്രയാന് 2 പേടകവും ഐ.എസ്.ആര്.ഒയുംവിജയകരമായി പിന്നിട്ടു. ആറു ദിവസത്തെ യാത്രക്ക് ശേഷം പേടകംചന്ദ്രന്റെ ഭ്രമണപഥത്തിലെത്തി. രാവിലെ 8.30നും 9.30നും ഇടയില് ലിക്വിഡ് അപ്പോജി മോട്ടോര് ജ്വലിപ്പിച്ചാണ് പേടകംഭ്രമണപഥത്തില് പ്രവേശിച്ചത്. പേടകം ഇപ്പോള് ചന്ദ്രനില് നിന്ന് അടുത്ത ദൂരം (പെരിജി) 118 കിലോമീറ്റും അകന്ന ദൂരം (അപോജി) 18078 കിലോമീറ്ററുമായ ഭ്രമണപഥത്തിലാണ്.
ആഗസ്റ്റ് 14ന് ഭൂമിയുടെ ഭ്രമണപഥത്തിന് പുറത്തെത്തിയ ചന്ദ്രയാന് രണ്ട് ഗതിമാറ്റ ദൗത്യം വിജയകരമായി പൂര്ത്തിയാക്കിയാണ് ചന്ദ്രനിലേക്ക് യാത്ര തിരിച്ചത്. ചന്ദ്രന്റെ ഭ്രമണപഥത്തിലെത്തിയ പേടകത്തെ ഘട്ടംഘട്ടമായി ചന്ദ്രനില് നിന്നും 100 കിലോമീറ്റര് അകലെയുള്ള ഭ്രമണപഥത്തിലെത്തിക്കണം. ഇതിനായി ആഗസ്റ്റ് 21 (121x4303), 28 (178x1411), 30 (126x164), സെപ്റ്റംബര് ഒന്ന് (114x128) എന്നീ തീയതികളിലായി നാലു തവണ ഭ്രമണപഥം മാറ്റുന്ന ദൗത്യം നടക്കും.
13 ദിവസം ചന്ദ്രന്റെ ഉപരിതലത്തില് വലംവെച്ച ശേഷം ഉപഗ്രഹവും വിക്രം ലാന്ഡറും വേര്പ്പെടും.സെപ്റ്റംബര് ഏഴിനായിരിക്കും ലാന്ഡറിന്റെ അതി സങ്കീര്ണമായ മൃദുവിറക്കം (സോഫ്റ്റ് ലാന്ഡിങ്) നടക്കുക.സോഫ്റ്റ് ലാന്ഡിങ് വിജയകരമായി പൂര്ത്തിയാക്കിയാല് ചന്ദ്രന്റെ ദക്ഷിണ ധ്രുവത്തില് ഇറങ്ങുന്ന ആദ്യ രാജ്യമാകും ഇന്ത്യ. 2008 ഒക്ടോബര് 22നാണ് ആദ്യത്തെ ചാന്ദ്രപര്യവേക്ഷണ ദൗത്യമായ ചന്ദ്രയാന്-1 ഇന്ത്യ വിക്ഷേപിച്ചത്.