ജനങ്ങളെ അഭിസംബോധന ചെയ്ത് ബൈഡന്
ന്യൂയോര്ക് ; അമേരിക്കന് പ്രസിഡന്റ് തെരഞ്ഞെടുപ്പില് വിജയിച്ചതിന് പിന്നാലെ രാജ്യത്തെ അഭിസംബോധന ചെയ്ത് ജോ ബൈഡനും വൈസ് പ്രസിഡന്റ് കമലാ ഹാരിസും. അമേരിക്കയുടെ ലോക നേതൃപദവി തിരിച്ചു പിടിക്കുമെന്ന് ജോ ബൈഡന് പറഞ്ഞു. രാജ്യത്തെ ഒന്നിപ്പിക്കുന്ന പ്രസിഡന്റ് ആയിരിക്കും താന് എന്നും, ജനങ്ങള് അര്പ്പിച്ച വിശ്വാസത്തിന് ജോ ബൈഡന് നന്ദിയും പറഞ്ഞു.
രാജ്യം ജനാധിപത്യത്തിന്റെ അന്തസ് കാത്ത് സൂക്ഷിച്ചു. ഇത് ജനാധിപത്യത്തിന്റെ വിജയമാണ്. ചരിത്രത്തിലെ ഏറ്റവും വലിയ വിജയമാണ് അമേരിക്കന് ജനത സമ്മാനിച്ചത്. തെരഞ്ഞെടുപ്പില് എല്ലാ വിഭാഗത്തില്പ്പെട്ട ജനങ്ങളുടേയും പിന്തുണ ലഭിച്ചു. വംശീയത തുടച്ചു നീക്കി ഒന്നിച്ചു നില്ക്കേണ്ട സമയമാണിതെന്നും, ആക്രോശങ്ങള് മാറ്റിവച്ച് ഒന്നിച്ച് പ്രവര്ത്തിക്കണം. ഡോണള്ഡ് ട്രംപിന് വോട്ട് ചെയ്തവരെ നിരാശരാക്കില്ല. ശാസ്ത്രജ്ഞരുടെ പിന്തുണയോടെ കൊവിഡിനെ നേരിടുമെന്നും ജോ ബൈഡന് പറഞ്ഞു.